Marcial tuloy ang ensayo para sa Tokyo Games

MANILA, Philippines — Walang balak si three-time Southeast Asian Games champion Eumir Felix Marcial na magpahinga dahil tuloy lang ang ensayo bilang paghahanda sa mas malaking labang haharapin nito - ang 2020 Olympic Games.

Nakahirit ng tiket sa Tokyo Olympics si Marcial matapos pagharian ang men’s middleweight sa 2020 Asian-Oceanian Boxing Olympic Qualifying Tournament na ginanap kamakailan sa Amman, Jordan.

Mabagsik ang Zamboanga City pride na patunay ng pagiging dugong Pinoy na hindi umaatras sa anumang laban.

Sa katunayan, nakasiguro na ng puwesto si Marcial nang talunin nito si Mongolian Byamba Otgonbaatar sa quarterfinals pa lamang.

Sa naturang laban, nagtamo si Marcial ng bukol matapos ang hindi inaasahang pagkakauntog sa ulo ng Mongolian pug.

Puwede na sanang ipagpaliban ni Marcial ang kanyang semifinal bout kontra kay Indian Ashish Kumar para makapagpahinga dahil sigurado na naman ito sa Olympic berth.

Subalit hindi pumayag si Marcial.

Itinuloy nito ang laban.

Tinalo ng Pinoy pug si Kumar sa semis kasunod ang pananaig kay Abilkhan Amankul ng Kazakhstan sa finals para masikwat ang gintong medalya sa kanyang dibisyon.

Dahil sa kanyang korona sa Asian tilt, seeded si Marcial sa Tokyo Olympics kaya’t malabong makaharap nito ang mga top-ranked boxers sa mundo sa unang bahagi ng draw.

Sa ngayon, balik-ensayo na si Marcial kasama ang iba pang miyembro ng national team na magtatangka pang humirit ng tiket sa Tokyo Games.

“Tuloy lang sa training dahil alam kong mas matinding laban na ang haharapin ko sa Japan. Mas malalakas ang makakalaban ko kaya kailangan kong maging handa sa laban,” ani Marcial.

Malaki ang tsansa ni Marcial na makasungkit ng medalya.

Nakasiguro na ito ng pilak noong 2019 AIBA Men’s World Boxing Championships sa Russia.

Maliban kay Marcial, pasok din si SEA Games silver medalists Irish Magno sa women’s flyweight division.