Bulldogs, Unisol segurado luna semis sa Sunday.com 6th Conference

CEBU, Philippines — Dili na mabangbang, segurado nang makaangkon og luna sa semifinals ang Bulldogs ug ang Unisol human midaog sa ilang tagsa ka mga duwa sa Sunday.com 6th Conference League  niadtong Miyerkules didto sa Benedicto College gym sa A.S. Fortuna St., Mandaue City.

Gihambat sa Bulldogs ang 1Med, 78-68 ug ang Unisol mitiklo sa 3Coins sa iskor nga 104-99.

Ang Bulldogs ni Tata Nadera ug Unisol ni John Paul Espija nag-uban gihapon sa unang dapit sa standing sa managsama nilang baraha nga 4-1.

Si Jeric Gonzaga maoy topscorer sa Bulldogs nga mipugnit og 27 puntos.

Ikaduhang topscorer si Jobus Bustamante nga miugkat og 14 puntos sa Bulldogs nga sa pagsugodd pa lang nag-wild dayon aron molansang og 29-7 sa first quarter.

Bisan pa sa dakong labaw, ang 1Med wala kawad-i sa paglaum ug padayong nga nakigbisog hangtod nga nakan-an ang labaw sa Bulldogs ngadto na lang sa 13 puntos  human sa tulo ka kuwarter, 53-40.

Misuway pag-ilog sa labaw ang 1Med, apan bisan giunsa nila og paningkamot wala gyud nila magukdi ang Bulldogs.

Si John Jordan miiskor og 16 puntos aorn mangulo sa 1Med ni Junaide Alindajao, gisundan ni Kristian Sanchez nga adunay 15 puntos.

Sila si Budz Pepito ug Nielfred Bacus nagkumboya'g 21 puntos sa napildeng 1Med nga hingpit nang nanamilit sa liga uban ang 5-1 nga baraha.

Sa laing bahin, ang Unisol gipangulohan ni Jericho Cortes nga miburak og 28 puntos. 

Nakatampo sab og dako si Mayeh Muñez pinaagi sa iyang 18 puntos, si Rex Tuazon nga adunay 14 puntos ug Ranil Cortes sa iyang 10 puntos.

Ang 3Coins ni Ray Neiz gipangulohan ni Christopher Zambo nga miantog og 30 puntos.

Laing upat niya ka  ang miiskor og double figures sa 3Coins nga aduna na'y 3-2 nga baraha ning maong liga nga giorganisar sa presidente niining si Tata Nadera ug league adviser Atty. Sally Malig-on.

Ang tinuig nga liga gipaluyohan ni Mayor Jonas Cortes, Cong. Lollypop Ouano-Dizon, PB Jonkie Ouano, Alex Malakooti, Mr. & Ms. Naig, Wendell Suico ug Tata Nadera.

PUNTOS MATAG USA

Unang duwa:

BULLDOGS (78) – J. Gonzaga 27, Bustamante 14, T. Grafe 9, A. Bacus 6, Cabahug 6, Tan 6, Apa Sr. 4, Bacus 2, Sanchez 2, Cabillo 2.

1MED (68) – Jordan 16, Sanchez 15, Pepito 11, Bacus 10, Cutamora 9, Labrador 7.

Ikaduhang duwa:

UNISOL (104) – J. Cortes 28, Muñez 18, Tuazon 14, R. Cortes 10, Dela Peña 9, Cabintoy 8, Gela 8, Tabar 6, Flaminia 3.

3COINS (99) – Zambo 30, Alquizar 18, Cañas 12, Manatad 12, Entrampas 11, Del Castillo 8, Omolon 4, Saludares 2, Lapinid 2.