Bucks namawi, mitipi sa Pacers

CEBU, Philippines — Dali nga nakabawi ang Milwaukee Bucks sa miagi nilang kapildihan ug gipahimungtan sa ilang kapungot ang Indiana Pacers, 119-100 sa NBA kaghapon didto sa Fiserv Forum sa Milwaukee, Wisconsin.

Si reigning MVP Giannis Antetokounmpo miratsada og 29 puntos uban ang 12 ka rebounds, samtang si Khris Middleton miiskor og otso sa iyang 20 puntos sa nagbaga nilang opensa sa ikatulong kuwarter nga nakatabang sa Bucks pagbangon gikan sa 105-89 nilang kaparotan sa mga kamot sa Miami Heat duha ka adlaw ang milabay.

Ang gibansagan nga "Greek Freak" wa'y sipyat sa pito niya ka free throws alang sa Bucks nga mipasud og 20 ka free throws kumpara sa siyam lamang sa Pacers.

Si Donte DiVincenzo mitapos uban ang 19 puntos, samtang si Eric Bledsoe mitali og 16 puntos ug pito ka assists alang sa Bucks nga mipukan sa Pacers sa ikatulong higayon ning season ug midaog kapito sa miagi nilang walo ka duwa.

Ang Pacers nakasikit sa halftime, 56-58, apan ang Bucks milusad og eksplosibong 26-9 rally sa ikatulong kuwarter nga nahimo nilang taytayan sa kalampusan.

Si TJ Warren mihipos og 18 puntos alang sa Pacers, kansang upat ka sagunson nga daog naputol.