Sandal Brocker hari sa Power Forty Sinulog Cup 2020
CEBU, Philippines — Bago pa lang gani miapil sa liga, apan ang Sandal Brocker mao dayon ang naghari.Gipakita sa Sandal Brocker ang ilang kabangis dihang gilubong nila og maayo ang kanhi kampiyon Water Market, 105-77 aron langkaton ang korona sa Power Forty Basketball Tournament 50-Above Sinulog Cup niadtong Martes diha sa Inayawan Sports Complex.
Kuyaw kaayong nakaduwa si Wewe Cabrera diin mirehistro kini og career-high 47 puntos aron pangulohan ang Sandal Brocker.
Miabag sab sa maong kadaogan si Alex Cabreros nga mitikdol og 18 puntos ug ingon man si Julyan Capala nga mitimbre'g 15 puntos sa team ni Alex Sandal nga milubong og katunga sa Water Market sa first quarter, 28-14.
Aron maseguro ang daog, ila pang giinat ang labaw ngadto sa 76-51 paingon sa fourth quarter.
Si Bodak Tantiado mao sab ang nangu sa Water Market nga miburak og 20 puntos, samtang sila si Gogo Fuentes ug Atan Diaz nagkumboya'g 25 puntos sa team ni Vez Eleguin.
Sa sayo pa, ang LJR Ventures mipukan sa Park 'N Go Bakeshop, 70-65 aron mopahiluna sa ikatulong puwesto.
Mismo ang team owner nga si Engr. Edwin Rabaya ang nangu sa kadaogan pinaagi sa iyang 25 puntos, gisundan ni Celso Cabaluna nga adunay 15 puntos.
Sila si Tony Ungria, None Sabandeja ug Edwin Dejacto nagtampohay og 10 puntos sa LJR Ventures nga maoy midiktar sa tibuok duwa.
Ang Park 'N Go ni Romy Rama, gipangulohan nilang Eric Espinosa ug Teody Ebrado nga parehong mikandos og 15 puntos.
Ang liga nagmalampuson tungod sa pagtinabangay sa tanang miyembro sa Power Forty ballclub ubos aktibo ug maabtikon nilang presidente nga si Edwin Dejacto ug ingon man nilang Paw Dejacto, Talyo Tamara, Tedy Cabanada ug Shaun
Dejacto nga maoy nagpadagan sa mga duwa.
Sa laing bahin, ang outgoing president nga si Dejacto mipahibalo nga adunay praktis sa matag Martes ug Sabado sa gabii pangandam sa Summer League 2020 nga gikatakdang sugdan karong Mayo.
PUNTOS MATAG USA
Unang duwa:
LJR VENTURES (70) – Rabaya 25, Cabaluna 15, Ungria 10, Sabandeja 10, Dejacto 10.
PARK 'N GO (65) – Espinosa 15, Ebrado 15, Gaviola 11, Mosqueda 10, Pestaño 9, Buhay 5.
Ikaduhang duwa:
SANDAL (105) – Cabrera 47, Cabreros 18, Capala 15, Nacional 9, Allerta 6, Manturillas 4, Echavez 2, Sandal 2,
Galagar 2.
WATER MARKET (77) – Tantiado 20, Fuentes 15, Diaz 10, Lim 6, Ozon 6, Yosores 5, Eleguin 4, Abellanosa 2.
- Latest
