Casimero dako'g tsansa modaog batok ni Inoue
CEBU, Philippines – Masaligon si MP Promotions head Sean Gibbons sa tsansa ni WBO bantamweight champion JohnRiel 'Cuadro Alas' Casimero nga bihagon ang wa'y pildeng WBA/IBF bantamweight champion nga si Naoya 'The Monster' Inoue sa Japan sa giatngan nilang unification bout karong Abril 25 didto sa Mandalay Bay Events Center sa Las Vegas.
Nagkanayon si Gibbons nga kining awaya wala na'y atrasay alang ni Casimero gumikan kay lagmit wala na'y ugmang nagpaabot alang sa pambato sa Ormoc City kon ugaling mapilde kini.
Apan kon ugaling molampus sab, si Gibbons miingon nga awtomatik mamahimong superstar si Casimero ug mosulbong kini sa tumang pagkasikat.
Sayod hinuon si Gibbons nga lisud nga tahas ang sagubangon ni Casimero, apan salig siya sa kapasidad sa iyang batos nga patilawon si Ionue og pilde sa labing unang higayon.
"Casimeros the complete package," matud pa ni Gibbons segun sa taho ni Quinito Henson sa The Philippine STAR, igsuong mantalaan sa Banat News. "He's smart, slick. He can punch, he shoulder-rolls, he can box. What makes him more special is he’s dangerous from round one to round 12. Casimero can knock you out cold whether it’s the first round or the last round."
Si Casimero nagkupot og 29-4 record uban ang 20KOs, samtang si Inoue wala pa'y pilde sa 19 ka away diin 16 sa iyang mga biktima iyang gipakamang. Silang duha parehong three-division world champion hinungdan nga seguradong usa ka eksplosibong kumbati ang masaksihan sa mga fans.
- Latest
