T.S.O. 'N Company mipaduol sa 1st DBL semifinals

CEBU, Philippines — Midako ang kahigayonan sa T.S.O. 'N Company nga moabante sa crossover semifinals sa 1st Dayon Basketball League (DBL) Invitational Tournament.

Kini dihang ilang gidemolis ang Karahus, 94-51 niadtong Sabado diha sa Sambag 1 Sports Complex, Dakbayan sa Sugbo.

Si JR Contado, kansang duwa wala gyud molubad gikan sa pagsugod maoy topscorer sa T.S.O.  nga nagpabiling lider sa bracket A standing uban ang 4-0 nga baraha. Mibirada siya'g 35 puntos.

Kontrolado sa T.S.O. ang duwa ug wala sab mibahar ang ilang opensa human miposte og 20-10 nga labaw sa first quarter.

Sayo sab silang nagtungkawo sa kadaogan dihang ila pang gipalawman ang lubong sa Karahus ngadto sa 44-17 sa halftime.

Sa laing aksiyon sa bracket A, ang ELJ 77 mikulit sa ilang ikaduhang daog human makaipsot sa Bulldogs, 67-65.

Sila si Jun Canoneo ug Vel Engracial parehong mikamada og 18 puntos aron mangulo sa scoring ELJ 77.

Gumikan sa maong kadaogan, ang ELJ 77 nakamugna og triple-tie sa ikatulong dapit uban sa Bulldogs ug SB Ballers sa managsama nilang baraha nga 2-2.

Ang Bulldogs gipangulohan sab ni Warren Ybañez nga mikabkab og 24 puntos, gisundan ni Aron  Suson nga adunay 16 puntos.

Labaw og 20 puntos ang ELJ 77 sa halftime, 38-18, apan namugnaw sa third period hinungdan nga nailog sa Bulldogs ang bentaha human sa maong kuwarter, 49-45.

Nibalik hinuon ang kainit sa ELJ 77 aron mabalik sa ilang mga kamot ang momemtum.

Sa bugtong duwa sa bracket B, ang Niño General Merchandising mikulit sa ilang ikaduhang sunod-sunod nga daog pinaagi sa paglubong sa Bobcats, 70-52.

Mitimbre og 27 puntos si Jorge Genobiagon aron pangulohan ang Niño General Merchandising nga aduna na'y 2-2 record, samtang ang Bobcats nagtangag og 1-3 nga baraha ning maong liga nga nahimo pinaagi sa paningkamot ni Sambag 1 barangay councilor Allan Glen Abella.

Ang liga nga gipaluyohan sa Dayon Enterprises and Printing Press, AJ Sportswear, Atisor Cakes Art 'N Design, Sisig Teriake ug Cebu's Tasty, gipadagan ni Edwin Dejacto inabagan nilang Bede Sungahid, Talyo Tamara, Bobot Cabrera ug Paw Dejacto sa CEBRA.

PUNTOS MATAG USA

Unang duwa:

NIÑO General Merchandising (70) – Genobiagon 27, Racanas 15, Solivio 10, Bauri 6, Villamor 6, Carillas 4, Arrogante 2.

BOBCATS (52) – Tagaloguin 17, Ybañez 12, Ho 8, Velasquez 7, Abayon 2, Cahibaybayon 2, Marimat 2, Inot 2.

Ikaduhang duwa:

ELJ 77 (67) – Canoneo 18, Engracial 18, Ranceli 10, Inso 7, Go 5, Ocaña 5, Ecojedo 4.

BULLDOGS (65) – Ybañez 24, Suson 16, Santisas 8, Abella 5, Anoba 4, Salas 3, Abellita 3, Tagimacruz 2.

Ikatulong duwa:

T.S.O. (94) – Contado 35, Girasol 13, Santisas 10, Romano 9, Oyangurin 8, Senarillos 7, Labaya 6, Talas 4, Jungoy 2.

KARAHUS (51) – Mabato 10, Maru 10, Englis 8, Dequilla 6, Ceballos 5, Cabugnason 6, Escabarte 3, Dayangco 3, Rabusa 2.