Gilas Pilipinas angat vs Indons

2021 FIBA Asian Cup Qualifiers

MANILA, Philippines — Nakatakdang lumipad ngayong araw ang Gilas Pilipinas patungong Jakarta, Indonesia para sa pagsabak nito sa 2021 FIBA Asian Cup qualifiers.

Haharapin ng Pilipinas ang host Indonesia sa Linggo sa Britama Arena kung saan mataas ang morale ng Pinoy cagers matapos pangalanan ni interim head coach Mark Dickel ang Final 12 para sa laban.

Binubuo ang Gilas Pilipinas ng pinagsamang bagito at beteranong manlalaro sa pangunguna ni team captain Kiefer Ravena.

Kasama rin ang kapatid nitong si Thirdy Ravena gayundin sina CJ Perez, Roger Pogoy, Troy Rosario, Poy Erram, Justin Chua, Abu Tratter, Juan Gomez De Liano, Isaac Go, Dwight Ramos at Matt Nieto.

Magsisilbing reserve players sina Javee Mocon, Jaydee Tungcab at Rey Suerte.

Naniniwala si Dickel na isang solidong lineup ang nabuo nito matapos ang ilang linggong pag-aaral kung sinu-sino ang mga ipapasok nito.

“We felt that the PBA players that we picked gave us a really, really good base to build off. And then, the other four or five younger players can complement them,” ani Dickel matapos ang ensayo ng Gilas Pilipina sa Meralco Gym.

Alam ni Dickel na palaban ang kanyang tropa na hindi sasantuhin ang Indonesia sa kabila ng home crowd advantage nito.

“So, that was the decision that was made. That’s why we made it, we feel this will give us the best chance in this window to do well,” ani Dickel.

Mas lalong lumakas ang tsansa ng Gilas Pilipinas dahil hindi maglalaro si naturalized player Lester Prosper para sa Indonesia.

Mismong si Indonesia head coach Rajko Toroman ang pumili kay Lester para maging naturalized player.

Ngunit wala ito sa lineup ng Indonesia.

Ayon sa mga ulat, bigong makakuha si Lester ng Indonesian passport.

Kaya naman isang all-Indonesian squad ang isasabak ng host country – ang parehong koponang inilaban nito sa 2019 Southeast Asian Games na ginanap sa Maynila noong Disyembre.