FIBA 3x3 asia cup posibleng ilipat sa pilipinas sakaling...
MANILA, Philippines — Posibleng sa Pilipinas na lamang ganapin ang International Basketball Federation (FIBA) 3x3 Asia Cup sakaling makansela ang event sa Mayo 13 hanggang 17 sa Changsha, China dahil sa coronavirus outbreak.
Malaki ang tsansa na sa Pilipinas mapunta ang hosting right dahil may kapasidad itong magtaguyod ng isang malaking international event gaya ng Asia Cup.
Ayon kay FIBA 3x3 event manager Ignacio Soriano, pinag-aaralan ng organisasyon na ilipat na lamang ang Asia Cup dahil sa mga kaganapan sa China.
“We’re already working in potentially changing the host city for the FIBA 3x3 Asia Cup which is happening in May. The city is Changsha, which is in the northern part of China. We’re working with different hosts but as of now nothing is official,” wika ni Ignacio.
Maraming sporting events sa China ang nauna nang nakansela.
Pinakahuli na ang Formula One na gaganapin sana sa Shanghai sa Abril 17 hanggang 19.
“We need to understand that the sports panorama is changing. The F1 has been cancelled; all the major sports events in China have been cancelled. So, we’re just monitoring the situation and we’re working to maybe relocate the Asia Cup,” dagdag pa ni Ignacio.
Handa naman si Chooks to Go Pilipinas 3x3 president Ronald Mascariñas na saluhin ang hosting rights dahil maraming available venues sa Pilipinas na maaaring pagdausan ng torneo.
Una nang ginanap sa Pilipinas ang Asia-Pacific Super Quest at Manila Challenger noong nakaraang taon.
“If you (Soriano) don’t find any host, we can hold that as well,” ani Mascariñas.
Ang grupo ni Mascariñas ang hahawak sa FIBA 3x3 World Tour Manila Masters sa Mayo 2 hanggang 3 na gaganapin sa SM Megamall.
Samantala, puspusan na ang paghahanda ng four-man national team para sa FIBA 3x3 Olympic Qualifying Tournament (OQT) na papalo sa Marso 18 hanggang 22 sa Bangalore, India.
Magkakasama na sa ensayo sina Joshua Munzon, Alvin Pasaol at sina 2019 Southeast Asian Games gold medalists CJ Perez at Mo Tautuaa.
- Latest
