Makati, Manila puro na sa semis
MANILA, Philippines-- Kapwa lumapit ang No. 2 seed Manila at No. 3 seed Makati sa isang hakbang patungo sa semifinals nang magwagi sa magkahiwalay na laban sa pagpapatuloy ng Northern Division Quarterfinal round ng 2019-2020 Maharlika Pilipinas Basketball League (MPBL)-Chooks-to-Go Lakan Cup sa San Andres Sports Arena.
Pinataob ng Manila Stars ang No. 7 seed Pasig-Sta. Lucia Realtors, 91-88 habang inilampaso naman ng Makati Super Crunch ang No. 6 seed Bulacan Kuyas, 94-88, para hawakan ang 1-0 lead sa kani-kanilang best-of-three series.
Humataw si Carlo Lastimosa ng mataas na 71 porsyentong shooting sa 10-of-14 sa field goal upang pangunahan ang panalo ng Stars sa kanyang 23 puntos, isang rebound at dalawang assists habang si Gabby Espinas ay tumulong ng 11 puntos, apat na rebounds at dalawang assists.
Hindi naman naging magaan ang panalo ng Super Crunch dahil naiwanan pa sila ng anim na puntos sa kalagitnaan ng fourth quarter bago umarangkada si Juneric Baloria ng pito sa huling 14 puntos ng Makati para masungkit ang malaking panalo.
Umani si Baloria ng 20 puntos, tatlong rebounds at dalawang assists at tig-17 puntos naman sina Joseph Sedurifa at Cedric Ablaza.
- Latest