Pagpapadala ng atleta sa mga Olympics qualifying hihigpitan ng PSC
MANILA, Philippines — Maghihigpit ang Philippine Sports Commission sa pagpapadala ng mga atletang lalahok sa ilang qualifying tournaments para makakuha ng tiket sa 2020 Olympic Games sa Tokyo, Japan.
Ito ay kaugnay sa banta ng 2019-nCoV na lumaganap na sa 23 bansa, kabilang ang Japan na magsasagawa ng Olympics sa Hulyo 24 hanggang Agosto 9.
Ayon kay Philippine Sports Commissioner Ramon Fernandez, kailangan muna nilang pag-aralan ang mga bansang pupuntahan ng mga national athletes.
“Iyong mga trips ngayon ng mga NSAs (National Sports Association) as far as my oversight (committee) is concerned ay mayroong mga qualifying na pupuntahan sila,” wika ni Fernandez. “We just play it by ear. Kung walang mangyaring masama sa mga athletes, tuloy but if not we just have to cancel everything.”
Idinagdag pa ng four-time PBA Most Valuable Player awardee na kailangang pag-aralan ang paglaganap ng coronavirus sa mga bansang pagdarausan ng Olympic qualifying tournaments.
“We have this virus play out in the coming weeks and months because even the IOC is a bit worried. July na ‘yan (Olympics). Lumaki na talaga ito (banta ng coronavirus),” ani Fernandez.
Wala pang opisyal na pahayag ang IOC kung kakanselahin ang pagdaraos ng 2020 Olympics sa Tokyo sa Hulyo.
“Countermeasures against infectious diseases constitute an important part of our plans to host a safe and secure games,” pahayag ng Tokyo Olympic Committee.
Tanging sina world gymnastics champion Carlos Edriel Yulo at pole vaulter Ernest John Obiena ang nakakuha ng tiket para sa nasabing quadrennial event.
- Latest
