James, Durant, Curry apil sa U.S. Olympic pool
CEBU, Philippines – Apil si LeBron James ug ang duha ka injured superstars nga sila si Stephen Curry ug Kevin Durant sa 44 ka players nga pagapilian aron maglangkob sa United States basketball team alang sa umaabot nga 2020 Tokyo Olympics.
Gikan sa maong taas nga listahan, 12 lamang ang kuhaon aron modala sa bandila sa Amerika sa basketball event sa maong prestihiyosong torneyo nga mahitabo kausa lamang sud sa upat ka tuig.
Ubos sa pagtimon ni coach Gregg Popovich, ang Team US naglaraw sa ikaupat nilang sagunson nga gold medal human sila nanghawod niadtong 2008 didto sa Beijing, 2012 didto sa London ug 2016 didto sa Rio de Janiero.
Si Curry, ang alas sa Golden State Warriors nga wala kaayo makaduwa karon nga season human maoperahi ang tuo niyang kamot, daan nang mipahibawo sa iyang interes nga moduwa sa Tokyo Olympics. Gikatakda siyang mobalik sud sa korte sa NBA sunod bulan.
Sa iyang bahin, si Durant wala pa'y klaro kon moapil ba sa team kay hangtod karon nagpa-alim pa man siya sa iyang injury. Wala pa gani siya makapakita'g aksiyon bisan kausa sukad siya mitapon sa Brooklyn Nets niadtong Hulyo sa miaging tuig.
- Latest
