Suns mipakaging sa Rockets

CEBU, Philippines — Nakalitan ang Houston Rockets sa bangis nga opensiba sa Phoenix Suns hinungdan nga gilubong kini, 91-127 sa duwa nila sa NBA kagahapon didto sa  Taking Stick Resort Arena sa Phoenix, Arizona.

Bisan pa og hapit siya gi-trade sa Suns, ang forward nga si Kelly Oubre mipakita sa iyang katakus og miiskor siya og career-high 39 puntos aron pangulohan ang Suns, samtang ang shooter nga si Denver Booker mikulit og 33 puntos.

Ang Suns nahimutang sa ika-12 nga dapit sa Western Conference sa rekord nga 21-31 ug maisip nga usa ka upset nga kadaogan ilang gibuhat nga paglubong sa Rockets nga nagkupot sa ikalimang dapit sa  33-19 win-loss record.

Mao sab kini ang unang daog sa Suns batok sa Rockets sukad niadtong 2016.  

Ang Rockets miduwa nga wala ilang All-Star nga si Russell Westbrook nga gipapahuway tungod sa injury. Si James Harden maoy bida sa Rockets human miiskor og 32 puntos.

Didto sa Bankers Life Fieldhouse sa Indiana, ang bisitang Toronto Raptors miinat sa ilang winning-streak ngadto sa 13 pinaagi sa pagtiklo sa Pacers, 115-106.

Ang defending NBA champion gibidahan ni Serge Ibaka nga mipabuto og 22 puntos ug milangkat og 10 ka rebounds, samtang ang point guard nga si Fred Van Vleet mihimo og 20 puntos.

Sa uban pang mga duwa, ang Utah nakaeskapo sa Portland, 117-114, ang Oklahoma City mipilde sa Detroit, 108-101, ang Philadelphia mipakgang sa Memphis, 119-107, ang Washington  mipatapsing sa Dallas, 119-118 ug ang Boston mipukan sa Atlanta, 112-107.