PSC pinag-iingat ang mga atleta sa coronavirus
MANILA, Philippines — Gusto lamang ng Philippine Sports Commission na ingatan ang mga atleta.
Kaya naman rerebisahin ni PSC chairman William ‘Butch’ Ramirez ang pagsasanay ng mga atleta sa China sa gitna ng pagkalat ng coronavirus.
“Yes, Chairman is inclined to review the plan of sending foreign training to China despite no China athletes were affected by the NCOV particularly one of our foreign coach is from the said area,” wika ni PSCExecutive Director Atty. Guillermo Iroy.
Nanggaling ang coronavirus sa Wuhan, China na isa sa mga naging venues ng FIBA World Cup noong 2019.
Bunga ng paglaganap ng coronavirus ay kinansela ang ilang qualifying tournaments para sa darating na 2020 Olympic Games.
Sinabi ni Iroy na ligtas naman sa nasabing virus sina world champion gymnast Edriel Carlos Yulo at pole vaulter Ernest John Obiena.
Sina Yulo at Obiena ang dalawang Filipino athletes na nakapagbulsa ng tiket para sa 2020 Tokyo Olympics.
“So far naman Obiena is in Italy and Yulo is in Japan,” dagdag pa ng PSC Executive Director sa pagsasanay ng dalawang Olympic-bound athletes.
Kaugnay nito ay pinag-iingat din ng sports commission ang mga national athletes na kasalukuyang nagsasanay sa kani-kanilang venues sa Rizal Memorial Sports Complex sa Vito Cruz, Manila, sa Philsports Arena sa Pasig City at sa Teacher’s Camp sa Baguio City.
- Latest
