SMB-Alab lusot sa Slingers sa OT
MANILA, Philippines — Natakasan ng San Miguel-Alab Pilipinas ang Singapore Slingers sa overtime, 86-77, sa 2019-2020 Asean Basketball League (ABL) sa Sta. Rosa Multi-Purpose Sports Complex sa Sta. Rosa, Laguna.
Nalimitahan ng Pinoy team ang mga Singaporeans sa anim na puntos sa extension kung saan umiskor ng pinagsamang 15 points sina Nick King, Jason Brickman, Sam Deguara at Prince Williams para sa kanilang ika-walong panalo sa 12 laro.
Tumipa si Brickman ng limang puntos kabilang ang triple sa huling 11.3 segundo para itaas ang Alab Pilipinas sa ikalawang puwesto sa likuran ng Thailand Mono Vampire (9-4).
Tumapos ang Fil-Am guard na si Brickman na may 16 points, 4 rebounds, 5 assists at 2 steals.
Umiskor naman si King ng 20 points, habang may 10 markers si Fil-Am Jeremiah Gray para sa tropa ni coach Jimmy Alapag.
Nakatakdang labanan ng SMB-Alab ang Kuala Lumpur Dragons ngayong alas-8 ng gabi sa MABA Stadium.
- Latest