Kapin 2,000 midagan sa Run for Kobe

CEBU, Philippines — Sobra sa 2,000 ka mga runners ug fans ni Los Angeles Lakers star Kobe Bryant ang misalmot sa 'Run for Kobe', usa ka tribute run alang sa mipanaw nga NBA legend, kagahapon didto sa Cebu City Sports Center.

Nasayran nga nakurat ang tibuok kalibutan sa sports niadtong miaging semana human ang balita nga pagkahagsa sa usa ka helicopter diin luwan si Bryant, iyang anak nga si Gianna ug laing pito didto sa California. Ang siyam gideklarar nga patay human sa maong trahedya.

Dili man usa ka competitive run, gipakita sa mga Cebuano ilang paghandum ni Bryant pinaagi sa ilang paginukdanay sa 24K ug 8K categories. Ang duha ka race categories pahinungud ni Bryant kinsa misul-ob sa jersey nga 8 ug 24 sud sa kapin usa ka dekada niya sa NBA.

Ang usa sa mga organizers nga si Isaac Miko Masiglat sa EPIC Performance miingon nga midayo pa ang mga taga-Bohol, Dumaguete ug mga taga-laing dapit sa Visayas aron musalmot sa maong lumba.

Gidugang ni Masiglat nga ilang gitun-an karon nga himuon nga usa tinuig ang maong event.

“The turn-out was really overwhelming. Di ko ka describe sa akong gibati karon, but I’m so happy all are safe," matud ni Masiglat.