Bucks gilat-an ang Wizards
CEBU, Philippines – Middleton mipahinungod sa career-high ngadto ni Kobe
Gipahinungod ni Khris Middleton ang labing nindot nga duwa sa iyang karera ngadto ni Kobe Bryant.
Si Middleton mipatuasik og career-high 51 puntos aron pangulohan ang Milwaukee Bucks ngadto sa 151-131 nga pagkastigo sa Washington Wizards sa NBA kagahapong adlawa.
Tayming kaayo ang pagbuto ni Middleton, nga milangkat sab og 10 ka rebounds ug mipasa og unom ka assists, gumikan kay ang Bucks miduwa man nga wala ang superstar nilang si Giannis Antetokounmpo kay dunay angol.
Matud pa ni Middleton nga sa miaging mga adlaw naghuna-huna siya kabahin ni Bryant, nga namatay tungod sa helicopter crash niadtong Lunes.
“Kobe was one of my favorite players growing up besides (Michael) Jordan,” matud pa ni Middleton. “I took a lot from his game. Everybody says Mamba mentality. To go out there and put on that type of performance, I definitely can dedicate that game to him as a thank you for what he did for the game.”
Didto sa Dallas, si Devin Booker mi-iskor og 20 sa iyang 32 puntos sa ikatulong kuwarter samtang si Deandre Ayton mipabuhagay og 31 puntos sa dihang gipakauwawan sa Phoenix Suns ang Mavericks, 133-104.
Sa uban pang mga resulta, sila si Serge Ibaka, Pascal Siakam, Fred VanVleet ug Kyle Lowry nagkumboya og 79 puntos sa dihang gibalian og pako sa Toronto Raptors ang Atlanta Hawks, 130-114, samtang sila si Gordon Hayward ug Jaylen Brown nagkumbinar og 54 puntos aron agakon ang Boston Celtics ngadto sa 109-101 nga pagpakaging sa Miami Heat.
- Latest
