E-F Surplus, J-J Surplus gisugat dayon og daog

CEBU, Philippines – Miarangkada dayon ang E-F Surplus ug ang J-J Surplus aron moiskor sa daog sa una nilang duwa sa J&J Basketball Tournament Season 1 niadtong Martes diha sa J&J gym sa Pagutlan, Tayud, Liloan.

Gisubhan sab og daog ang Union Galvasteel human ma-forfeit ang Good Harvest. Ang E-F Surplus mipilde sa Nazarene, 73-63 ug gipukan sab sa J-J Surplus ang Crossover Basketball sa iskor nga 62-54. Si Kenn Nuñez mikabya og 21 puntos aron mangu sa pagratsada sa E-F Surplus nga wala na molingi pa human miabante og dos puntos, 45-43 pagtapos sa tulo ka kuwarter.

Sila si Tingan Gestupa ug Tata Betinol nagkumbinar og 30 puntos sa team ni Fury Trazona. Bugtong si Benedicto Sajul lang ang miiskor og double figures sa Nazarene pinaagi sa iyang 16 puntos.

Sa laing bahin, tulo sab ka players sa J-J Surplus ni ballclub president Henry Agbon ang miiskor og double digits pinangulohan ni Jomar Tiwan nga miratsada og 14 puntos, gisundan ni Lando Agbon sa iyang 12 puntos ug Terrence Cadao nga adunay 10 puntos.

Ang napildeng Crossover Basketball gipangulohan sab ni Lubon nga miburak og 20 puntos.

Ang mga duwa gidumala ni league commissioner Fury Trazona inabagan sa iyang committee nga sila si Harry Espante, Chang Tejero ug Eric Montebon.