Middleton inakay ang Bucks vs Wizards

MILWAUKEE - ZHumataw si Khris Middleton ng career-high 51 points para saluhin ang trabaho ni injured teammate G­iannis Antetokounmpo at banderahan ang Bucks sa 151-131 paggupo sa Washington Wizards.

Tinulungan ni Middleton, gustong mapili sa All-Star reserve sa ikalawang sunod na pagkakataon, ang Milwaukee na mau­ngusan ang pagbangon ng Washington sa second half.

Nagtala rin si Middleton ng 10 rebounds at 6 assists at nagsalpak ng 7-of-10 shooting sa three-point line.

Iniskor din ng Milwaukee (41-6) ang franchise-record 88 points sa first half para sa kanilang pang-siyam na sunod na panalo sa kabila ng hindi paglalaro ni Antetokounmpo, may right shoulder injury.

Pinamunuan ni Bradley Beal ang Wizards (15-31) sa kanyang 47 points.

Sa Memphis, dumiretso ang Grizzlies sa kanilang ikatlong sunod na ratsada matapos talunin ang Denver Nuggets, 104-96.

Tumipa si Dillon Brooks ng 24 points habang nagposte si Jonas Valanciunas ng 23 points at 12 rebounds para sa Memphis.

Nag-ambag si Ja Morant ng 14 points, ang 10 dito ay ibinuhos niya sa fourth quarter para sa Grizz­lies.

Binanderahan ni Nikola Jokic ang Nuggets mula sa kanyang 25 points at 13 rebounds para sa kanyang ika-22 double-double sa 28 games.

Sa Miami, nagposte si Gordon Hayward ng 29 points at may 25 mar­kers si Jaylen Brown para pamunuan ang 109-101 pagdaig ng Boston Celtics kontra sa Heat.

Pinangunahan ni Goran Dragic ang Miami mula sa kanyang 23 points kasunod ang 20 markers ni Jimmy Butler.