‘Black monday!
Kobe, anak na si Gianna patay sa helicopter crash
MANILA, Philippines — Nagluluksa ang buong mundo sa pagkamatay ni NBA star Kobe Bryant kasama ang walo pang biktima ng helicopter crash kahapon sa Calabasas, California.
Kaliwa’t kanan ang pagbibigay ng tribute mula sa iba’t ibang personalidad at sports icons hindi lamang sa mundo ng sports maging sa pulitika, showbiz at businessmen partikular na yung mga nakasalumuha ang basketball legend.
Hindi maikakaila na malapit sa puso ni Kobe ang Pilipinas dahil sa mainit na pagtanggap sa kanya ng mga Pinoy fans sa oras na dumarating ito sa bansa.
Kaya naman kani-kanya ring tribute ang mga Pilipino sa pangunguna na ni eight-division world champion Manny Pacquiao at ilang Philippine Basketball Association coaches at players.
“The world lost a legend today but the impact and legacy he leaves behind will last forever! #RIPMamba,” anang reigning World Boxing Association super welterweight champion na si Pacquiao sa kanyang Instagram post.
Hangang-hanga si five-time PBA Most Valuable Player June Mar Fajardo kay Kobe na mabuting tao aniya sa loob at labas ng court.
“He is my idol. Yung buhay talaga natin sobrang unpredictable kelangan talaga natin maging mabuti sa kapwa natin at ‘wag manakit at walang inaagrabyado,” ani Fajardo.
Bumuhos ang pagdadalamhati ng ilang NBA players kabilang na sina legendary Michael Jordan at LeBron James na hindi makapaniwalang wala na si Bryant na kilala sa tawag na Black Mamba.
“Words can’t describe the pain I’m feeling. We used to talk often and I will miss those conversations very much,” ani Jordan.
Nagpaabot din ng pakikiramay si dating US president Barack Obama na tinawag na legend si Kobe sa loob at labas ng court gayundin sina American football star Tom Brady at Brazilian football icon Neymar.
“Kobe was a legend on the court and just getting started in what would have been just as meaningful a second act,” ani Obama.
Maliban kay Bryant, nasawi rin sa crash ang kanyang 13-anyos na anak na si Gianna at pito pang ibang biktima.
- Latest
