Malacañang, Pacquiao nagluksa sa pagkamatay ni NBA legend Kobe Bryant

MANILA, Philippines — Nagpaabot ng kanilang pakikiramay ang Palasyo at iba't ibang personalidad sa pagyao ng NBA player at basketball legend na si Kobe Bryant, Linggo (Lunes sa Maynila).

Bumagsak ang sinasakyang helicopter ni Bryant sa Los Angeles, Estados Unidos, kasama ang walong iba pa. Walang nabuhay sa mga nakasakay.

Kasama ni Bryant ang 13-anyos niyang anak na si Gianna Maria, na kumpirmadong patay din.

"Nalulungkot ang Tanggapan ng Pangulo sa malungkot na balita ng pagkamatay NBA superstar at legend na si Kobe Bryant at kanyang anak na babae sa isang helicopter crash," sabi ni presidential spokesperson Salvador Panelo sa isang pahayag sa Inggles.

Aniya, madalas daw pumunta ang manlalaro sa Pilipinas at mahal na mahal ng kanyang Filipino fans.

Pitong beses na nakabisita ng Pilipinas ang 41-anyos na manlalaro.

"Isa siyang maestro sa kanyang kasanayan. Nawala ang isa sa mga maalamat na manlalaro ng mundo ng basketball," dagdag niya pa.

"Ipinaaabot ng Palasyo ang pakikiramay sa kanyang pamilya, mga kaibigan, katrabaho, mahal sa buhay at mga tagahangang naulila sa buong mundo. Nakikisama kami sa inyong kawalan."

Samantala, ikinalungkot din ng kapwa atleta at boksingerong si Sen. Manny Pacquiao ang pagkawala ni Kobe, na itinuturing niyang matalik na kaibigan.

Dagdag pa niya, dati nang binisita ni Bryant ang "pambansang kamao" mag-ensayo noon.

The world lost a legend today but the impact and legacy he leaves behind will last forever! #RIPMamba pic.twitter.com/Sp56zAvrht

— Manny Pacquiao (@MannyPacquiao) January 26, 2020

"Nabigla ako. Nagulat ako sa balita. Ang bilis ng pangyayari," wika ni Pacquiao.

"Kaibigan ko siya."

Nagpaabot din ng kanilang pakikisimpatya sa kanyang pagkawala sina Sen. Imee Marcos, Sen. Risa Hontiveros at Sen. Sonny Angara.

Ilang showbiz personalities rin ang hindi na naiwasang maantig ng nangyari, kahit na ilan sa kanila ay hindi naman fans ng basketball.

"Sa totoo, wala akong alam sa basketball pero nalulungkot ako sa pagkamatay ni Kobe Bryant at ng kanyang anak," sabi ni Kapuso star Maine Mendoza.

"Ipagdarasal namin ang kanyang pamiluya, lalo na ang kanyang misis, kasama na ang iba pang pamilya na naulila ng trahedyang ito. Ang iski ng buhay... hindi natin alam ang susunod na mangyayari."

I honestly know nothing about basketball but I am really saddened by Kobe Bryant and daughter’s demise. Prayers go out to his family, especially his wife, also to the families who lost their loved ones in this horrific tragedy. Life is so short.. and unpredictable. ??

— Maine Mendoza (@mainedcm) January 27, 2020