James nahigitan na si Bryant
No. 3 sa career scoring
PHILADELPHIA - May nakasulat na tribute kay Kobe Bryant sa kanyang Nike shoes, nilampasan ni LeBron James ang retiradong Los Angeles Lakers great para sa third place sa NBA career scoring list.
Ngunit diniskaril ito ng 76ers matapos kunin ang 108-91 panalo laban sa Lakers kung saan umiskor si James ng 29 points.
Isinulat ni James ang “Mamba 4 Life” sa kanyang sapatos bilang parangal kay Bryant, ang five-time champion.
Inungusan ni James si Bryant nang isalpak ang milestone basket sa 7:23 minuto sa third quarter.
Tinapos ni James ang laro na may 33,655 points kasunod ang 33,643 ni Bryant sa NBA scoring list.
“Continuing to move the game forward @KingJames. Much respect my brother #33644,” wika ni Bryant sa kanyang Twitter.
Sa Minneapolis, humataw si Dennis Schroder ng 26 points at may 25 markers si Chris Paul para tulungan ang Oklahoma City sa 113-104 paggupo sa Minnesota Timberwolves.
Ito ang pang-limang sunod na ratsada ng Thunder.
Umiskor naman si Karl-Anthony Towns ng 37 points sa panig ng Timberwolves.
Sa Cleveland, nagpasabog si Zach LaVine ng 44 points para banderahan ang 118-106 panalo ng Chicago Bulls kontra sa Cavaliers.
Nagtala rin ang 6-foot-5 guard ng 10 rebounds at 8 assists para sa Bulls.
Sa Salt Lake City, kumolekta si Rudy Gobert ng 22 points, 17 rebounds at 5 blocks para ihatid ang Utah Jazz sa 112-107 come-from-behind victory laban sa Dallas Mavericks.
- Latest
