Lakers mipaksit sa Nets
CEBU, Philippines — Si LeBron James miposte sa ika-10 niyang triple-double karon nga season sa dihang gitiwasan sa Los Angeles Lakers ang kalbaryo sa nagkagidlay nga Brooklyn Nets, 128-113 sa NBA kagahapon.
Ang five-time MVP mikolekta og 27 puntos, 12 ka rebounds ug 10 ka assists alang sa ika-91 nga triple-double sa iyang karera nga iyang gikulit atubangan sa 17,700 ka mga fans didto sa Barclays Arena nga naglangkob ni kanhi US President Bill Clinton.
Ang mas nindot kay hapit nang maapsi ni James si Kobe Bryant alang sa ikatulong puwesto sa listahan sa NBA all-time leading scorers.
Human sa duwa, si James nakatigum na og 33,626 puntos, 17 puntos na lang ang biya sa record ni Bryant. Duna siya'y tsansa nga mapuhalan si Bryant karong Domingo sa ilang duwa batok sa Philadelphia 76ers.
Gawas ni LeBron, lain pang tulo ka players ang misidlak sa Lakers nga mipatilaw sa Nets sa ika-12 nga pilde sa miagi niining 14 ka duwa.
Si Anthony Davis dunay 16 puntos ug 11 ka rebounds, si Kyle Kuzma midugang og 16 puntos, samtang si Danny Green miposa og 14 puntos.
Sa laing aksiyon, si Bradley Beal mipabuto og 36 puntos sa dihang gipakaging sa Washington Wizards ang Cleveland Cavaliers, 124-112.
- Latest