Taulava gikatakdang mohimo og kasaysayan
CEBU, Philippines — Usa ka rekord nga lisud tupngan ang himuon ni NLEX Road Warriors center Asi Taulava tungod kay moduwa pa siya sa sunod season sa PBA.
Ang 46-anyos nga si Taulava mao unya ang bugtong PBA player nga moduwa sa tulo ka managlahing dekada human sa iyang ika-21 nga season sa liga.
Si NLEX coach Yeng Guiao mibutyag nga gilihok na nila ang extension contract sa kanhi PBA MVP ug mabalik siya sa Road Warriors human mapupos iyang kontrata. Bisan pa og siya ang labing edaran nga player sa liga, si Taulava pabiling lagsik ug dako gihapon siya'g natampo sa NLEX atol sa ilang team practice pangandam sa Philippine Cup nga buksan sa Marso.
Si Taulava misulod sa PBA niadtong 1999 ug mihimo dayon og kasikas isip usa ka dominanteng sentro. Gibayaw siya nga MVP niadtong 2003 nga niadtong higayona nakampiyon ang giduwaan niyang Talk N' Text.
- Latest