Reyes lumipat sa Sta. Lucia Realty

MANILA, Philippines — Tuloy ang rigodon sa Philippine Superliga matapos lumipat si dating Petron middle blocker Mika Reyes sa Sta. Lucia Realty sa bagong season ng liga na magsisimula sa susunod na buwan.

Kinumpirma ng pamunuan ng Sta. Lucia Realty ang anunsyo sa kanilang official social media accounts kung saan mainit nitong tinanggap ang 5-foot-10 na dating De La Salle University standout.

“Mika Reyes said Yes! Yes to taking on new challenges. Yes to a new environment. And yes to being a part of #thenewSTALUCIA. And with that, we officially welcome you to the Sta. Lucia family, Mika! Let’s get it,” ayon sa anunsiyo ng Lady Realtors.

Mula F2 Logistics, lumipat si Reyes sa Petron Blaze Spikers kung saan tatlong taon din itong namalagi bago magdesisyong lumipat sa kampo ng Sta. Lucia.

Bahagi si Reyes ng Blaze Spikers na nagkampeon sa apat na kumperensiya ng liga - 2017 All-Filipino Conference, 2018 Grand Prix, 2018 All-Filipino Conference at 2019 Grand Prix.

Ito ang ikaapat na koponan ni Reyes sa PSL.

Una na itong nasilayan suot ang Meralco jersey noong 2015 kasunod ang F2 Logistics noong 2016.

Makakasama ni Reyes sa Sta. Lucia si Filipino-American wing spiker MJ Phillips at bagong recruits na si dating Adamson University standout Eli Soyud gayundin sina Amanda Villanueva, Rachel Austero, Rebecca Rivera, Roselle Baliton, Pamela Lastimosa at Andrea Marzan.

Bagong mukha rin ang ipaparadang head coach ng Lady Realtors dahil kinuha nito si Eddison Orcullo para hawakan ang programa ng koponan.

Pinalitan ni Orcullo si dating mentor Babes Castillo.