Ceres binokya ang Thailand

MANILA, Philippines — Ginulantang ng three-time Philippines Football League champion Ceres Negros FC ang powerhouse Port FC-Thailand sa pamamagitan ng 1-0 desisyon upang umabante sa final round ng prestihiyosong 2020 Asian Football Confederation (AFC) Champions League qualifiers na ginanap sa PAT Stadium sa Bangkok, Thailand.

Nasandalan ng Ceres si team captain Filipino-German midfielder Stephan Schrock nang isalpak nito ang goal sa ika-51 minuto ng laro para dalhin ang Pinoy squad sa panalo.

Sa kabila ng pagiging lider ng koponan, hindi sinarili ni Schrock ang tagumpay dahil ang panalo at resulta aniya ng teamwork na ipinakita ng Ceres sa buong panahon ng laro.

“We had some ideas in the set piece and we wanted to execute on one of them. Actually, I misinterpreted the sign of Mike (Ott) so I did a wrong decision. Luckily, it turns out well for me,” ani Schrock.

Makakaharap ng Ceres ang isa pang powerhouse squad na FC Tokyo sa Enero 28 para sa pagkakataong makapasok sa Champions League proper.