ABAP sasaluhin ang Olympic qualifiers hosting
MANILA, Philippines — Nagpahayag ng intensiyon ang Association of Boxing Alliances in the Philippines (ABAP) na itaguyod ang 2020 AIBA Asia/Oceania Olympic qualifying tournament.
Ito ay matapos makansela ang Olympic qualifiers sa Pebreo 3 hanggang 14 sa Wuhan, China dahil sa coronavirus outbreak na nagsimula sa naturang Chinese city.
Nagsumite na ng intensiyon ang ABAP sa International Olympic Committee (IOC) na siyang humahawak sa Olympic qualifying tournament sa boksing.
Inaasahang maglalabas ng desisyon ang IOC sa mga susunod na araw kung saan ililipat ang naturang event.
“We only have a little over two weeks to go. I know there are countries that have offered to host the event in lieu of Wuhan, China. We are also thinking about hosting it and I already sent feelers to the IOC task force regarding this,” ani ABAP secretary general Ed Picson.
Ayon kay Picson, preparado ang Pilipinas dahil sariwa pa ito sa matagumpay na pagtataguyod ng 2019 Southeast Asian Games.
May kapasidad ang bansa na maging host dahil mayroon itong mga kagamitan sa pasilidad na maaaring gamitin.
“We feel that with the recent staging of the Southeast Asian Games, we have the mechanics in place and the people who can perhaps undertake the hosting,” ani Picson.
Ligtas din aniya ang Pilipinas sa anumang virus.
Ang AIBA Asia-Oceania Olympic qualifiers ang magsisilbing tulay para makahirit ng tiket sa 2020 Olympic Games sa Tokyo, Japan.
Kasalukuyang nagsasanay ang national boxing team sa Bangkok, Thailand para paghandaan ang Olympic qualifiers.
- Latest
