Pacquiao mipahalipay ni Conor McGregor

CEBU, Philippines — Mi-congratulate si WBA welterweight champion Manny Pacquiao ngadto ni mixed martial arts superstar 'Notorious' Conor McGregor human midaog sa iyang comeback fight sa UFC batok ni American veteran  Donald Cerrone niadtong Domingo  didto sa Las Vegas.

Gamit iyang social media account, ang 41-anyos nga si Pacquiao mipahibalo ni McGregor nga mitan-aw siya sa sangka niini. 

"Congratulations to Conor McGregor. Notorious," matud pa ni Pacquiao sa iyang facebook account.

Ang simpleng pag-congratulate ni Pacquiao miani og nagkadaiyang reaksiyon gikan sa social media ilabi na nga daan  nang gidungog nga magsangka ang duha sa usa ka boxing match karong tuiga.

Si McGregor ang usa sa labing sikat nga combat athlete karon ug misaka na usab siya sa ring niadtong tuig 2017 diin nakigsangka siya ni Floyd Mayweather Jr. nga mipilde kaniya pinaagi sa 10th round TKO.

Ang handler ni McGregor ug UFC president nga si Dana White bukas sa posibilidad nga moaway pagbalik sa boksing si McGregor batok ni Pacquiao, apan mag-agad kini sa negosasyon.

Sa iyang bahin, si Sean Gibbons sa MP Promotions nagkanayon nga midako ang tsansa nga mahitabo ang maong 'blockbuster match' human sa impresibong kadaogan ni McGregor.