Sabonis, McDermott migiya sa Pacers

CEBU, Philippines —  Si Domantas Sabonis mirehistro og 'triple-double' uban ang 22 puntos, 15 ka rebound ug 10 ka assists, samtang si Doug McDermott miiskor og 18 sa iyang 24 puntos sa katapusang kuwarter aron agakon ang Indiana Pacers ngadto sa 115-107 nga kadaogan batok sa Denver Nuggets sa NBA kagahapon.

Wala sab magpabitin sila si Malcom Brogdon ug T.J. Warren nga parehong mitali og 22 puntos alang sa Pacers nga miputol sa 10 ka sagunson nilang pilde didto sa Pepsi Center. 

Ang Pacers nakasugakod sa 30 puntos nga pagbuto sa bitoon sa Nuggets nga si Nikola Jokic aron labnihon ang ikalima nilang sagunson nga daog.

Sila si Jerami Grant ug Will Barton dunay 16 puntos matag usa alang sa Nuggets nga napiangan kay wala ang tulo nila ka starters nga sila si Paul Millsap, Gary Harris ug Jamal Murray tungod sa injury.

Ang Nuggets mao kanunay ang naglabaw sa tibuok nga bahin sa duwa, apan natikalbong human gipabuthan og 41-26 nga bomba sa Pacers sa katapusang kuwarter.

Gani ang Pacers nakatilaw sa labing una nilang labaw, 98-97 sa nahibilin nga 4:13 sa duwa human sa tres ni McDermott.

Si Sabonis misalida sab dayon pinaagi sa pagpasud sa duha ka sagunson niyang itsa nga maoy nakapalabaw sa Pacers, 104-99 sa katapusang 1:30 sa aksiyon.