Mercado sa Phoenix na
Kapalit nina Revilla, Guevarra
MANILA, Philippines — Sa pang-walong pagkakataon ay muling nasangkot sa isang trade si veteran point guard Sol Mercado.
Inaprubahan kahapon ng PBA Commissioner’s Office ang pagdadala ng NorthPort kay Mercado sa Phoenix Pulse kapalit nina guards LA Revilla at Rey Guevarra.
Nagtala ang 35-anyos na Fil-American playmaker ng mga averages na 4.0 points, 1.6 rebounds at 0.9 assists sa kanyang siyam na laro para sa Batang Pier noong 2019 PBA Governors’ Cup.
Pinili si Mercado ng Alaska bilang fifth pick noong 2008 PBA Draft, ngunit kaagad na-trade sa Rain or Shine kasama si Eddie Laure kapalit ni Joe Devance at ng 2009 at 2010 second round picks ng Aces.
Matapos sa Elasto Painters ay naglaro ang tubong Sacramento, California sa Meralco Bolts, Batang Pier, San Miguel Beermen, Barako Bull at Ginebra Gin Kings.
Ibinigay ng Ginebra ang 6-foot-1 at three-time PBA champion sa NorthPort kasama sina Jervy Cruz at Kevin Ferrer kapalit ni Fil-Am guard Stanley Pringle noong Hunyo ng nakaraang taon.
Isa si Mercado sa mga naging susi ng Batang Pier sa nakaraang 2019 PBA Governors’ Cup bago nagkaroon ng injury.
- Latest
