Raptors mitipi sa Wizards
CEBU, Philippines — Miposa og unom ka tres si Marc Gasol sa iyang 20 puntos, samtang si Norman Powell mipabuto og 28 puntos sa defending champion Toronto Raptors nga milubong sa Washington Wizards, 140-111 sa NBA kagahapon didto sa Scotiabank Arena sa Toronto, Canada.
Sa maong duwa, ang Raptors mikadlit og franchise record human milansang og 22 ka 3-pointers.
"We're trusting one another, we're moving the ball," matud pa ni Powell nga mitusak og upat ka tres. "We're letting the offense work for us."
Dako sab og natampo si Terence Davis II nga mihakot og 23 puntos ug ingon man sila si OG Anunoby ug Serge Ibaka nagkumbinar og 33 puntos.
Wala sab magpa-alkansi sila si Pascal Siakam ug Kyle Lowry nga nagkumboya'g 23 puntos alang sa Raptors nga
midaog sa ilang korte sa ikalimang sunod-sunod nga higayon.
Si Troy Brown Jr. mi-iskor og 22 puntos, si Isaac Bonga dunay career-high 17 puntos ug 10 ka rebounds, samtang si Bradley Beal mihipos og 14 puntos apan silang tanan nangaminghoy kay ang Wizards napilde sa ikaupat nga higayon sa miagi nilang lima ka duwa.
Didto sa San Antonio, si Trae Young mikolekta og 31 puntos alang sa Atlanta Hawks nga nakabawi human maalkansi og 14 puntos sa katapusang kuwarter dayon na ngadto sa pagpakurat sa Spurs, 121-120.
Si Kevin Huerter mipasud sa krusyal niyang tres sa nahibiling 6.3 segundos aron tuldokan ang dalaygong pagbalitok sa Hawks.
Duna pa unta'y tsansa ang Spurs nga modaog, apan wala masud ang itsa ni DeMar DeRozan dayong kapupos sa oras.
Si Hawks rookie Cam Reddish mitapos uban ang 22 puntos, samtang sila si Huerter ug John Collins mikulit og 18 puntos matag usa alang sa Hawks nga nagbitbit na karon og 10-32 record nga maoy ikaduhang labing bati sa liga karon nga season.
- Latest