Gin Kings balik sa trono

CEBU, Philippines — Natilawan pag-usab sa Barangay Ginebra Kings ang PBA championship human nila taposa ang  best-of-seven finals series pinaagi sa pagpilde sa Meralco Bolts, 105-93 sa Game-5 niadtong Biyernes sa gabii  didto sa Mall of Asia Arena.

Ang Ginebra misakmit sa ika-12 nilang franchise title ubos sa giya sa multit-titled coach nga si Tim Cone.

Giangkon pud sa Kings ang ikatulo nilang Governors' Cup title ubos gihapon sa pagpangulo  ni import Justin Brownlee.

Atol sa Game-5, ang Ginebra nabiyaan og kapin 10 puntos sa third period, apan gipakita nila nga angay sila sa titulo nga 'Never Say Die' team human nila gipapas ang dakong labaw sa Bolts sa final period.

Impresibo ang kalampusan sa Ginebra tungod kay mipuwesto lang sila sa ikaupat nga dapit human sa elimination round sa rekord nga 7-4. Gibuntog nila ang Bolts nga mas nindot og performance sa elimination sa record nga 8-3.

Gibayaw nga finals MVP si Japeth Aguilar nga mi-average og 24 puntos sa maong serye.

Si Aguilar nakabuwelo dihang wala katiwas sa serye ang kaatbang niya  nga si Raymond Almazan nga nakaangkon og injury sa tiil.

Si Brownlee giisip usab nga maoy responsabli sa kadaogan  sa Ginebra tungod sa kakugi niini sa opensa ug rebounding. 

Si Ginebra official Alfrancis Chua miingon nga nga si Brownlee ang tinuoray nga 'Best Import' ug dili ang gikoronahan nga si Allen Durham sa Meralco.

Si Cone mitumbok usab ni Fil-American  Stanley Pringle nga  dako og natampo sa kadaogan sa Ginebra.