Magic nabaraw

CEBU, Philippines — Walay puangod nga gilubong sa Los Angeles Clippers ang Orlando Magic, 122-95 sa duwa nila sa NBA kagahapon didto sa Staples Center sa Los Angeles, California.

Mikadlit og 32 puntos si Kawhi Leonard aron pangulohan ang scoring sa Clippers.

Gawas ni Leonard nga mirehistro sa ikaupat niyang sunod-sunod nga 30-point performance, lain pang mihimo og double-figures sa Clippers  mao sila si Montrezl Harrell nga adunay 21 puntos ug sila si Landry Shamet ug Jamychal Green nga mihipos og 13 puntos matag usa.

Gikalipay ni Leonard ang ilang kadaogan kay misuporta kaniya ang iyang teammates. 

Wala gihapon makaduwa si Paul George tungod sa injury niini.

  Sa maong kadaogan, ang Clippers misaka sa ikatulong dapit sa ilang 29-13 win-loss record. 

Napapas usab ang tulo ka sunod-sunod nga daog sa Magic ug nagpabilin sa ikapitong dapit sa Eastern Conference uban ang 20-22 nga baraha.

Nangulo sa Magic mao si Nikola  Vucevic nga adunay 22 puntos, gisundan ni Aaron Gordon nga mitampo og 20.

Sa laing duwa, nalikayan sa No. 2 team sa West Conference Denver Nuggets nga mapilde sa huyang nga Golden State Warriors.

Ang Nuggets nangayo pa og overtime aron sa pagdispatsar sa Warriors, 134-131 didto sa California.

Nakahiagum usab og laing sakit nga kapildihan sa ilang kaugalingong korte ang New York Knicks dihang gipakaging sila sa Phoenix Suns, 121-98.