Team Marias, SportsYu nanghawod

CEBU, Philippines — Ang Team Marias ug SportsYu parehong nakaipsot batok sa ilang mga karibal aron dominahon ang tagsa-tagsa nila ka dibisyon sa 1st Mayor Edgardo Labella Cup Open Volleyball Tournament niadtong Domingo sa gabii didto sa Cebu City Sports Institute gym.

Ubos sa pagpangu ni two-time UAAP Most Valuable Player Sisi Rondina, ang Team Marias nagmilagro human mapukan sa nag-unang duha ka sets dayon na ngadto sa pagpatikalbong sa Harbor Pilot sa Oroquieta City, 18-25, 17-25, 25-17, 25-16, 15-11 aron langkaton ang korona ning usa ka semanang torneyo nga giorganisar sa Cebu City Sports Commission.

Gawas ni Rondina, ang kanhi collegiate stars nga sila si Therese Ramas, Jhena Quino, Dyan Barantinao, Jusabelle Brillo ug Kennette Garces misidlak sab uban sa Team Marias.

Nadoble ang selebrasyon ni Rondina gumikan kay siya man maoy gibayaw nga MVP.

Si Gloria Mates sa University of Southern Philippines Foundation (USPF) maoy ginganlan nga best libero.

Sa gubat alang sa ikatulong dapit, ang USPF high school squad mipilde sa Southwestern University (SWU)-Phinma college women's team, 25-18, 25-18, 15-25, 25-15.

Sa men's open, ang SportsYu munas-ginhawa sab nga midaog batok sa SWU-Phinma sud sa lima ka kulbahinam nga sets, 21-25,25-17, 25-24, 16-25, 15-10 aron birahon ang kampiyonato.

Si Royet Varga sa SportsYu maoy gipasidunggan nga MVP, samtang ang iyang teammate nga si Kothaisong Som maoy best libero.

Sa sayo pa, ang Mischka mipayaka sa Fiesta People, 25-18, 25-19, 25-27, 25-20 aron pagpahiluna niini sa ikatulong dapit.