Lakers mipaksit sa Mavs
CEBU, Philippines — Wala miduwa ang All-Star forward sa Los Angeles Lakers nga si Anthony Davis, apan bangis gihapon ang koponan human nila gilubong ang Dallas Mavericks, 129-114 sa NBA kagahapon didto sa American Airline Travel Center sa Dallas, Texas.
Si Davis igo lang nga mitan-aw gikan sa bench kay wala kini paduwaa sa coaching staff sa Lakers tungod sa nagsakit niyang bat-ang bunga sa iyang pagkahagba atol sa ilang duwa batok New York Knicks niadtong Miyerkules.
Sa pagkawala ni Davis, kinsa maoy leading scorer sa Lakers, gidoble ni three-time champion LeBron James ang obligasyon ug miposa kini'g 35 puntos ug milangkat og 16 ka rebounds, si Kyle Kuzma mirehistro sa iyang season-high nga 24 puntos.
Ang superstar sa Mavs nga si Luka Doncic miiskor og 25 puntos, apan wala niya matago iyang kadismaya sa iyang koponan ug gigisi niya iyang jersey tunga-tunga sa korte dihang gilumsan na sila sa Lakers sa second half.
Didto sa Vivint Smart Home Arena sa Salt Lake, Utah, ang Fil-American nga si Jordan Clarkson padayong mipakita nga usa siya sa mga bag-ong haligi sa koponan human siya mirehistro og 20 puntos aron bidahan ang Jazz nga mipukan sa Charlotte Hornets sa iskor nga 109-92.
Si Clarkson napunta sa Jazz niadtong miaging bulan human siya gi-trade sa Cleveland Cavaliers.
Sa ubang mga duwa, ang Brooklyn Nets mipilde sa Miami Heat sa iskor nga 117-113, ang Washington Wizards mibihag sa Atlanta Hawks, 111-101, ang Indiana Pacers miihaw sa Chicago Bulls, 116-105 ug ang Memphis Grizzlies mipaluhod sa San Antonio Spurs sa iskor nga 134-121.
- Latest