'Do-or-die' sa FYA Season 24 Soontit Construction Cup
CEBU, Philippines — Mag-abot sa katapusang higayon ang mga karibal aron ilogan ang nahabiling duha ka luna sa semifinals sa FYA Basketball League (Season 24) Soontit Construction Cup karong adlawa diha sa Atillo gym sa Punta Princesa, Dakbayan sa Sugbo.
Kini human malugwayi ang kinabuhi sa Bro J Bakery ug Harold's Hotel dihang ilang gipilde ang tagsa-tagsa nilang mga kontra nga pulos armado og 'twice-to-beat' advantage sa quarterfinals niadtong Martes diha sa Atillo gym.
Ang Bro J Bakery mipilde sa AVTES, 80-71 ug gipilde sab sa Harold's Hotel ang Yoyi's Pastries & Desserts sa iskor nga 86-71.
Si Justine Urot maoy topscorer sa Bro J Bakery nga mikabkab og 17 puntos, apan si Van Anthony Ensong maoy best player of the game tungod sa iyang pagkamada og 15 puntos, 11 ka rebounds, unom ka assists ug upat ka steals.
Mirehistro sab og 15 puntos si Rio dela Peña, samtang si Dandan Enriquez mitampo'g 10 puntos sa Bro J Bakery ni Junrey Arreglo nga wala na molingi pa human milabaw og tres puntos pagtapos sa third period, 53-50.
Si FYA president Dexter Caballero ug Ryan Villaver pareho untang mibundak og 20 puntos, apan nausik lang kay nabaraw ang ilang pagsud sa semis.
Si Joel Baiño mitimbre og 11 puntos sa AVTES nilang Allen Tulod ug Macky Macachor.
Sa laing bahin, si Ava Flores mipugnit og 21 puntos nga gidayan-dayanan og lima ka rebounds, lima sab ka assists ug upat ka steals aron mahimong best player of the game.
Si Niko Laborte miambit og 15 puntos, samtang sila si Ryan Dacayana ug Nene Billones nagkumboya'g 25 puntos sa Harold's Hotel ni Arnel Trinidad.
Ang team manager nga si Ahlmark Albarracin mao sab ang nangu sa napildeng Yoyi's Pastries & Desserts sa iyang 17 puntos, gisundan ni Reyboy Caballes nga adunay 15 puntos.
Sila si Jao Rabadon ug Charles Limbaga nagtampohay'g 13 ug 10 puntos sa pilderong koponan.
PUNTOS MATAG USA
Unang duwa:
BRO J BAKERY (80) – J. Urot 17, VA Ensong 15, R. Dela Peña 15, D. Enriquez 10, J. Arreglo 5, R. Patalita 5, N. Arias 5, E.
Noquillo 4, J. Flores 2, C. Laud 2.
AVTES (71) – D. Caballero 20, R. Villaver 20, J. Baiño 11, J. Ursal 7, D. Tabares 4, B. Tabaña 4, J. Sydiongco 3, W.
Dacayana 2.
Ikaduhang duwa:
HAROLD'S HOTEL (86) – A. Flores 21, N. Laborte 15, R. Dacayana 13, N. Billones 12, R. Arias 7, E. Jumantoc 6, S.
Cal 5, C. Arnado 5, J. Celestial 2.
YOYI'S PASTRIES (71) – A. Albarracin 17, R. Caballes 15, J. Rabadon 13, C. Limbaga 10, J. Aglipa 4, C. Cababahay 2, W. Auditor 2, V. Lastomen 2, J. Martinez 2, P. Canoy 2.
- Latest
