Rosauro mikulata ni legowo sa ONE Championship
CEBU, Philippines — Gipakita sa Cebuano mixed martial artist ug pambato sa Yaw-Yan ArDigma Cebu nga si Roel 'Akiyama' Rosauro nga seryoso siya nga buhion iyang karera human niya kulataha si Yohan 'Iceman' Legowo sa ONE Championship didto sa Bangkon,Thailand niadtong Biyernes sa gabii.
Ang 31-anyos nga si Rosauro nakabawi gikan sa duha ka sunod-sunod niyang kapildihan sa ONE Championship batok nila ni Li Kai Wen sa China ug Terminator Sunoto sa Indonesia.
Bisan pa sa mga kapakyasan, ang garbo sa Camotes Island, mipakita og determinasyon ug miresulta iyang kahago sa training dihang sayon niyang gikulata ang Indonesian veteran.
Nagsinukdanay pa sa ilang kumo ug patid ang duha sa first round, apan nakuha ni Rosauro iyang tiyempo sa ikaduhang round diin gipasud niya ang iyang mga hait nga patid ngadto sa lawas sa kontra. Misuway pagamit sa iyang abilidad sa grappling si Legowo, apan nadepensaan kini ni Rosauro.
Sa ikatulo ug katapusang round, naluya si Legowo ug gipahimuslan ni Rosauro kahigayonan pinaagi sa laing bangis nga ataki.
"Mao gyud to iyang last chance ug nalipay ko nga napakita ni Aki ang iyang skills," matud pa sa head trainer ni Rosauro ug Yaw-Yan ArDigma Cebu founder nga si Master Benigno 'Ekin' Caniga Jr.
- Latest
