Bulacan Kuyas nagpalakas sa No. 4
MANILA, Philippines — Patuloy ang pag-akyat ng Bulacan Kuyas sa standing matapos ilampaso ang Parañaque Patriots, 76-69, sa pagpapatuloy ng Chooks-to-Go-Maharlika Pilipinas Basketball League (MPBL) Lakan Cup sa Alonte Sports Complex sa Biñan, Laguna.
Umani si JR Taganas ng 16 puntos at 11 rebounds upang makopo ang ika-apat na sunod na panalo at umangat sa ika-apat na puwesto sa 17-8 win-loss kartada sa likuran ng Makati Super Crunch (20-5), Manila Stars (21-5) at solo leader San Juan Knights na tangan ang 21-3 win-loss kartada sa Northern Division.
Bagama’t nakasiguro na ang Kuyas sa kanilang pagpasok sa susunod na round, patuloy pa ring aalagaan ng Bulacan ang kanilang top four standing para makamit ang homecourt advantage sa playoff round.
Magiging karibal ng Bulacan ang No. 5 Bataan Risers (16-9) at No. 6 Pampanga Giant Lanterns (16-9) para sa No. 4 spot sa North group.
Sa iba pang laro, nagwagi rin ang Navotas Clutch kontra sa Valenzuela Classics, 88-83 habang tinambakan ng Biñan City ang bisitang Sarangani Marlins, 92-74, upang masungkit ang ika-12 panalo sa 26 laro sa Southern Division.
Dahil sa panalo, umakyat din ang Biñan City sa 10th spot sa 12-14 slate at patuloy ang pakikipag-agawan sa No. 8 playoff spot kasama ang No. 9 Cebu Sharks (11-12) at No. 8 Bicol Volcanoes (13-12).
- Latest