Bucks napukan sa Spurs

CEBU, Philippines – Mikamada og 25 puntos si DeMar DeRozan, samtang si Patty Mills miposa og unom ka tres sa iyang 19 puntos alang sa San Antonio Spurs nga mibihag sa haring gangis Milwaukee Bucks, 126-104 sa NBA kagahapon didto sa San Antonio.

Mahinungdanong elemento sa makapakurat nga daog sa Spurs mao ang pagbomba nila og 20 ka 3-pointers sa Bucks, 12 niini ilang  nahimo sa first half.

Mao kadto ang labing unang pilde sa Bucks sukad sila gipahagba sa Philadelphia 76ers niadtong adlaw sa Pasko. Hinuon, ang Bucks mao gihapon karon ang naghari sa liderato bitbit ang 32-6 record.

Samtang ang Spurs nagkumpayot sa ikawalong puwesto sa Western Conference uban ang 15-20 nga baraha.

Nangu sa pilderong Bucks mao si Giannis Antetokounmpo nga mihipos og 24 puntos, 12 ka rebounds ug walo ka assists.

Sa laing aksiyon, si Luka Doncic miposte sa ika-11 niyang triple' double karon nga season uban ang 38 puntos, 11 ka rebounds ug 10 ka assists sa dihang   gitumba sa Dallas Mavericks ang Chicago Bulls sa iskor nga 118-110.

Didto sa Atlanta, si Nikola Jokic mipabuhagay og career-high 47 puntos aron pangulohan ang Denver Nuggets  nga midagit sa Hawks, 123-115.

Wala sab mapaalkansi ang Washington Wizards nga mibihag sa Boston Celtics, 99-94 luyo sa 27 puntos ni Ish Smith.

Sa uban pang mga resulta, si T.J. Warren mirehistro og season-high 36 puntos sa Indiana Pacers nga mibuntog sa Charlotte Hornets, 115-104, samtang si Bojan Bogdanovic mikulit og 35 puntos ug si Joe Ingles midugang og 22 puntos sa  Utah Jazz nga nakaipsot batok sa New Orleans Pelicans, 128-126 alang sa ikaunom nilang sagunson nga daog.