San Juan, Manila wagi; Nueva Ecija lusot din
MANILA, Philippines — Kagaya ng inaasahan, nagtagumpay ang San Juan Knights kontra sa Navotas Clutch, 112-95 habang tinambakan naman ng Manila Stars ang Rizal Golden Coolers, 116-89, sa pagpapatuloy ng Chooks-to-Go-Maharlika Pilipinas Basketball League (MPBL) Lakan Cup sa San Andres Sports Complex sa San Andres, Manila.
Umani ng 21 puntos at limang assists si Orlan Wamar Jr. at 17 puntos na may kasamang pitong rebounds, dalawang assists at apat na steals mula kay John Wilson para manatili ang Datu Cup champion Knights sa solo liderato sa kanilang 21-3 win-loss kartada sa Northern Division.
Tumulong din ng 16 puntos, limang rebounds at tatlong assists si Rian Michael Ayonayon at tig-walong puntos bawat isa sina Larry Rodriguez at Lester Reyes upang ihulog ang Navotas Uni-Pak Sardines sa ika-14th puwesto sa 6-19 slate sa parehong Northern group.
Hindi rin nagpahuli ang Manila Stars at agad iniwan ang Rizal Golden Coolers tungo sa pagsungkit ng kanilang ika-21 panalo sa 25 laro at manatili sa ikalawang puwesto sa Northern group sa likuran ng San Juan.
Tumipak ng 28 puntos, apat na rebounds at apat na assists si Chris Bitoon at 16 puntos at apat na rebounds kay Mark Dyke upang muling pagtibayin ang laro mula sa mahabang bakasyon bago mag-umpisa ang playoff round.
Sa iba pang laro, sinorpresa ng expansion team Nueva Ecija Rice Vanguards ang Rajah Cup titlist Batangas City Athletics, 85-81, para makopo ang pang-pitong panalo sa 23 na laro.
- Latest
