James naka-triple double kadaogan sa Lakers batok Suns
CEBU, Philippines — Mirehistro na sab og triple-double si LeBron James uban ang 31 puntos, 13 ka rebounds ug 12 ka assists alang sa Los Angeles Lakers nga mipasawop sa Phoenix Suns, 117-107 sa NBA kagahapon didto sa Staple Center sa Los Angeles, California.
Diriyot hinuon mikolapso ang Lakers human miposte og 36 puntos nga labaw, apan dali nga nakabawi aron pakagingon ang Suns.
Si James nga mikadlit sa ikawalo niyang triple- double karon nga season, giabagan ni Anthony Davis nga mihipos og 26 puntos ug 11 ka rebounds ug ingon man nilang Kyle Kuzma ug Avery Bradley nga nagkumbinar og 37 puntos alang sa Lakers.
Si Devin Booker dunay 32 puntos ug si Kelly Oubre midugang og 26 puntos alang sa Suns nga napilde kasiyam sa miagi nilang 11 ka duwa.
Didto sa New York, si Julius Randle mitimbre og 22 puntos, samtang si Mitchell Robinson wa'y sipyat sa 11 niya ka itsa sa dihang gibaraw sa Knicks ang pagbalik ni Carmelo Anthony didto sa Madison Square Garden human ilang gilubong ang Portland Trail Blazers, 117-93.
Sa uban pang mga resulta, sila si DJ Augustin ug Nikola Vucevic nagkumbinar og 45 puntos sa Orlando Magic nga mipaksit sa Washington Wizards, 122-101 ug aron sab putlon ang upat ka sagunson nilang pilde, samtang si Giannis Antetokounmpo mipabuhagay og 32 puntos sa dihang gibuntog sa Milwaukee Bucks ang Minnesota Timberwolves, 106-104 aron inaton ang labing nindot nga record sa NBA karon nga season ngadto sa 31-5.
- Latest