Niemer, Mau gumawa ng ingay PSL tuloy ang arangkada
MANILA, Philippines — Matinding bakbakan ang nasilayan ng buong sambayanan sa 2019 season ng Philippine Superliga.
Bumungad sa mga volleyball fans ang salpukan ng pinakamahuhusay na volleyball players sa bansa kasama ang kani-kanilang matitikas na imports sa 2019 PSL Grand Prix noong Pebrero.
Binanderahan nina American reinforcements Stephanie Niemer at Kath Bell ang Petron Blaze Spikers para masungkit ang kampeonato.
Nakumpleto ng Blaze Spikers ang 14-0 sweep sa eliminasyon kasunod ang pagwasak sa Cignal HD Spikers sa semifinals, 2-0.
Subalit bahagyang naalog ang Petron ng matalo ito sa Game 1 ng best-of-three championship series laban sa F2 Logistics, 20-25, 25-16, 23-25, 23-25.
Ngunit hindi agad sumuko ang Blaze Spikers nang itarak nito ang panalo sa Game 2 (23-25, 25-23, 25-14, 25-19) at Game 3 (26-24, 25-19, 23-25, 25-19) para makuha ang titulo.
Sa kanyang pagbabalik sa Pilipinas, siniguro ni Niemer na “mission accomplished” ang kanyang makukuha matapos mabigong bigyan ng korona ang Petron noong 2016 edisyon ng Grand Prix.
Itinanghal si Niemer bilang Conference MVP.
Subalit naiba ang ihip ng hangin sa All-Filipino Conference.
Umentra sa F2 Logistics si Filipino-American Kalei Mau dahilan para mas maging mapanganib ang Cargo Movers.
Gaya ng inaasahan, madaling dinomina ng F2 Logistics ang torneo.
Hindi nakaporma sa Cargo Movers ang HD Spikers nang kubrahin nito ang 2-0 panalo sa best-of-three championship series.
Wagi ang F2 sa Game 1 (25-22, 26-24, 18-25, 17-25, 15-8) at Game 2 (25-14, 25-16, 25-19).
Napasakamay ni Mau ang Season MVP award.
Sa Invitational Conference, muling nagreyna ang F2 Logistics nang payukuin nito ang Petron sa one-game finals.
Nakuha naman ni Majoy Baron ang Season MVP plum.
Sa beach volleyball, matagumpay na naipagtanggol ng Petron ang korona sa kabila ng pagkawala ni Sisi Rondina sa lineup.
Nakasama ni Bernadeth Pons si Floremel Rodriguez para matamis na makopo ang ikatlong sunod na kampeonato ng Petron.
Sa men’s division, naghari sina Edmar Bonono at Ranran Abdilla ng Cignal HD Spikers.
- Latest