PATAFA puntirya ang mas maraming Olympic qualifiers
MANILA, Philippines — Mas maraming qualifiers sa 2020 Olympics Games sa Tokyo, Japan mas maganda.
Ito ang puntirya ng Philippine Athletics Track and Field Association kung saan nais nitong madagdagan ang mga atleta para mas lumakas ang tsansa ng bansa sa medalya.
Sa kasalukuyan, tanging si pole vaulter Ernest John Obiena pa lamang ang nakasiguro ng silya sa Tokyo Olympics.
Nagrehistro si Obiena ng 5.81 metro sa Street Meet sa Chiara, Italy noong Setyembre para maabot ang Olympic qualifying standard. Magarbong tinapos ni Obiena ang taon nang magtala ito ng bagong SEA Games record na 5.45 metro.
Target ni PATAFA president Philip Juico na masundan ang matagumpay na kampanya ng Pinoy tracksters sa 2019 Southeast Asian Games kung saan humakot ito ng 11 ginto, walong pilak at walong tansong medalya sa New Clark City Athletic Stadium sa Capas, Tarlac.
“We have more work to do. I think there will be more qualifiers from athletics,” ani Juico.
Tinukoy ng PATAFA chief sina trackster Kristina Knott, shot putter William Morrison at hurdles king Eric Cray sa mga may malalakas na tsansang makapasok sa Olympics.
Nagwagi si Knott ng dalawang gintong medalya sa SEA Games tampok ang bagong SEA Games record na 23.07 segundo sa 200m dash – na halos dikit na sa Olympic qualifying time na 22.08.
Sa kabilang banda, kumana si Morrison ng bagong SEA Games mark na 18.38 sa shot put.
“Morrison is a candidate for the Olympics. Kaya niya because he is throwing the metal ball at the 20-meter range. Hopefully, Cray will make it, too,” ani Juico.
Maliban kina Knott, Morrison at Cray, maganda rin ang performance ni Natalie Uy na nagsumite ng bagong Philippine record sa women’s pole vault.
- Latest
