Power Forty Sinulog Cup buksan na karong adlawa
CEBU, Philippines — Ang gikahinaman nga Power Forty Sinulog Cup 2020 sugdan na karong adlawa diha sa Inayawan Sports Complex.
Unom ka teams ang magtigi sa kampiyonato nga pangulohan sa defending champion Water Market ni Vez Eleguin.
Lain pang mga koponan nga mopakita'g aksiyon mao ang Park 'N Go Bakeshop ni Romy Rama, Bob 'N Chino nilang Bob Samson ug Chino Kalinga, LJR Ventures ni Engr. Edwin Rabaya, Team Sandal ni Alex Sandal ug Nacario Massage Parlor ni Edgar Nacario.
Gipahibalo ni ballclub president Edwin Dejacto Sr. nga ang maong liga eksklusibo lamang niadtong mga magduduwa nga nag-edad og 50-anyos pataas.
Gawas lang sa opening karong adlawa, ang mga duwa himuon matag Martes sugod sa alas-7:30 diha gihapon sa Inayawan Sports Complex.
Ang tulo ka bulan nga torneyo gipaluyohan nilang Atty. Flor Yosores, Romy Rama, Vez Eleguin, Dome Labalan, Alex Sandal, Dome Ozon ug Engr. Edwin Rabaya.
Gihangyo sab ni Dejacto ang tanang mga miyembro sa pagtambong sa opening kay human sa mga duwa himuon dayon ang Power Forty Ballclub Christmas Party 2019.
Sa unang duwa sa alas-7:30 sa buntag, magsangka ang LJR Ventures ug ang Nacario Massage Parlor, sundan sa engkuwentro tali sa Water Market ug Bob 'N Chino sa alas-9, ang Park 'N Go Bakeshop ug Team Sandal sa alas-10:30.
- Latest
