Pinas No. 5 sa list ng may pinakamaraming boxing titles sa 2019
MANILA, Philippines — Nasa No. 5 ang Pilipinas sa listahan ng may pinakamaraming world titles sa taong ito.
Apat na korona ang kasalukuyang nasa Pilipinas sa pagtatapos ng taong 2019.
Bumabandera si legendary boxer Manny Pacquiao na hawak ang World Boxing Association (WBA) welterweight title.
Dalawang beses nanalo sa taong ito si Pacquiao.
Isinelyo ng Pinoy champion ang unanimous decision win kay Adrien Broner noong Enero kasunod ang split decision win kay Keith Thurman noong Hulyo para mapanatili ang kanyang titulo.
Kinapitan naman ni Jonhriel Casimero ang World Boxing Organization (WBO) bantamweight crown kung saan sariwa ito sa impresibong third-round knockout win laban kay Zolani Tete noong Nobyembre 30 sa labang ginanap sa Arena Birmingham sa England.
Nasa listahan din si Jerwin Ancajas na kasalukuyang International Boxing Federation (IBF) super flyweight champion.
Gaya ni Pacquiao, dalawang beses ding nanaig sa taong ito si Ancajas.
Pinabagsak ni Ancajas sa sixth round si Ryuichi Funai ng Japan noong Mayo sa Stockton, California kasunod ang isa pang sixth-round knockout win kay Miguel Gonzalez ng Chile noong Disyembre 7 sa Puebla, Mexico.
Gumagawa naman ng sariling pangalan si Pedro Taduran na siyang nagmamay-ari ng IVF mini flyweight title.
Nakuha ito ni Taduran matapos gapiin ang kababayang si Samuel Salva noong Setyembre 7 via fourth-round knockout win sa Taguig City.
Nasa unahan ng listahan ng may pinakamaraming world champions ang United States na may 15 korona sa pangunguna ni Errol Spence na may dalawang titulo – ang WBC welterweight at IBF welterweight.
- Latest
