Team JTR kampiyon sa Mayor Labella Christmas League
CEBU, Philippines — Gipukan sa Team JTR (Journey To Recovery) si kanhi PBA star Dondon Hontiveros ug ang Fighter 50 Wine, 89-80 sa finals aron sakmiton ang titulo sa 1st Mayor Edgar Labella Christmas Inter-Commercial Basketball League niadtong Domingo didto sa Cebu City Sports Institute gym sa Barangay Sawang Calero.
Si Steve Castro maoy nangu sa balanseng ataki sa JTR uban ang 22 puntos, samtang si Cedrick Ablaza miamot og 19 puntos.
Dako sab og natampo si Darell Shane Menina nga mihipos og 16 puntos ug si Jayvee Bahio nga mikulit og double-double uban ang 15 puntos ug 14 ka rebounds alang sa JTR nga mibulsa og P100,000 sa pagdominar nila sa usa ka semanang torneyo nga giorgnisar sa Cebu City Sports Commission luyo sa paningkamot nilang chairman Ed Hayco, commissioner Atty. Francis Malilong, executive director Amilo Lopez ug tournament manager Allen Ceballos.
Si Hontiveros nga usa na karon ka konsehal sa Dakbayan sa Sugbo, miiskor og 20 puntos.
Sa engkuwentro alang sa ikatulong dapit, siyam ka players ang nagmangtas alang sa SG-ARQ Builders nga nimasaker sa ASPA Formworks, 145-80.
Si Vincent Minguito maoy nangu sa ARQ Builders uban ang 25 puntos, gisundan nilang Jesus Saga (18), Ferdinand Lusdoc (17), Allan Sala (16), Jojo Tangkay (15) ug Anchot Igot (14). Sila si Miguel Tabaloc, Reno Berami ug Chris Regero nakumbinar sab og 32 puntos alang sa ARQ.
- Latest
