Fighter 50 wine seguro na sud semis sa Mayor Labella christmas League
CEBU, Philippines — Nagpabiling wa'y pilde ang Fighter 50 Wine human gipayaka niini ang ASPA Formworks, 90-84, sa 1st Mayor Edgar Labella Christmas Inter-Commercial Basketball League niadtong Huwebes sa gabii didto sa Cebu City Sports Institute gym sa Barangay Sawang-Calero.
Bitbit ang 4-0 record, ang Fighter 50 segurado nang sud sa semifinals bisan og unsa pa'y resulta sa katapusan nilang duwa sa eliminasyon.
Si Marvin Hayes mao na sab ang nangu sa Fighter 50 uban ang 20 puntos ug walo ka rebounds. Miamot si Ice Blanco-Hontiveros og 16 puntos, samtang si William McAloney mikamada og 11 puntos sa Fighter 50 nga milusad og 25-14 rally aron paglubag sa 20-27 nga alkansi ngadto na sa 45-41 nga labaw sa halftime,
Sa laing bahin, ang ASPA, SG-ARQ Builders, KCS Lapu-Lapu ug Team JTR (Journey to Recovery) maoy mabugno sa nahibiling tulo ka luna sa semis bitbit ang managsamang 2-2 nga baraha.
Ang KCS Lapu-Lapu miposte sa ikaduha nilang daog human gipilde ang Siargao Wave Riders, 95-83, samtang ang ARQ Builders nagpabiling buhi sa Final Four human gilubong ang JTR, 94-73.
Si Melvin Butohan maoy bida sa KCS Lapu-Lapu uban ang 24 puntos ug gisundanni Ted Saga nga dunay 19 puntos, samtang si Patrick Yu maoy nangu sa ARQ Builders bitbit ang 27 puntos.
- Latest