Purefit Gym miharos sa FYA 24 elimination

CEBU, Philippines —  Giharos sa Purefit Gym ang pito nila ka duwa aron mogawas nga topseed pagtapos sa elimination round sa FYA Basketball Tournament (Season 24) Soontit Construction Cup 2019-2020.

Ang Purefit Gym nakaipsot sa kulbahinam nga duwa batok sa Harold's Hotel, 87-85 niadtong Domingo diha sa Atillo gym sa Punta Princesa, Dakbayan sa Sugbo.

Ang team manager nga si Mclain Alkuino maoy responsabli sa kadaogan pinaagi sa iyang krusyal nga itsa sa nahibiling 0.16 segundos sa duwa.

Gawas niini, si Alkuino aduna sa'y siyam ka rebounds, walo ka assists ug duha ka steals aron ilhon nga best player of the game.

Kondisyon sab kaayo si Wilson Gabucan nga miburak og 18 puntos, ingon man si Anthony Dante nga mibahog og 17 puntos sa Purefit gym nga nakalabang sa lawod sa kalisdanan.

Sila si  Val  Ramirez ug Kent Pepino nagkumbinar og 21 puntos sa Purefit Gym nga nakabaton og 'twice-to-beat' advantage sa quarterfinals batok sa No. 8 Pub Gee Resto Bar nga maoy iwit sa standing sa ilang 1-6 win-loss record.

Ang Harold's Hotel ni Arnel Trinidad nga napunta sa ikalima uban ang 3-4 nga baraha, gipangulohan nilang Niko Laborte ug Reden Arias nga parehong mipupo'g 16 puntos, gisundan ni Carlos Arnado nga adunay 11 puntos ug Ava Flores sa iyang 10 puntos.

Sa sayo pa, gipanamastamasan og maayo sa AVTES ang Bro J Bakery pinaagi sa paglubong og 61 puntos sa iskor nga 103-42 nga maoy kinadak-ang lubong sa kasaysayan sa liga.

Gumikan niini, ang AVTES nakamugna og 'triple-tie' alang sa ikaduhang dapit uban sa Masterline ug Yoyi's Pastries & Desserts sa managsamang 4-3 nga baraha. Apan ang Masterline maoy nakaangkon sa ikaduha nga luna gumikan sa mas taas nga quotient system output. Ikatulo ang AVTES ug nalandig sa ikaupat ang Yoyi's Pastries & Desserts.

Miduslit sa kainit sa opens sa AVTES mao si Rommel 'The Sticky' Laput nga mirehistro og double-double sa iyang 24 puntos ug 10 ka assists nga nakapahimo kaniya isip best player of the game.

Nanginit sab si Jade Ursal nga miamot og 21 puntos sa AVTES nilang Allen Tulod ug Macky Macachor.

Si FYA president Dexter Caballero miambit og 15 puntos, samtang si Bryce Tabaña mitampo'g 14 puntos.

Walay bisan usa ka player ni Junrey Arreglo ang miiskor og double digits hinungdan nga nalubong og maayo ang iyang koponan nga Bro J Bakery.

PUNTOS MATAG USA

Unang duwa:

AVTES (103) – R. Laput 24, J. Ursal 21, D. Caballero 15, B. Tabaña 14, D. Tabares 8, J. Sydiongco 8, R. Dechosa 8, L. Ares 3, J. Baiño 2.

BRO J BAKERY (42) – J. Urot 7, E. Noquillo 6, R. Patalita 6, Ed. Noquillo 6, R. Dela Peña 4, J. Flores 4, D. Enriquez 4, O. Ursal 3, N. Arias 2.

Ikaduhang duwa:

PUREFIT GYM (87) – M. Alkuino 19, W. Gabucan 18, A. Dante 17, V. Ramirez 11, K. Pepino 10, J.  Rara 6, A. Montillero 6.

HAROLD'S HOTEL (85) – N. Laborte 16, R. Arias 16, C. Arnado 11, A. Flores 10, E. Jumantoc 8, N. Billones 7, J. Cabañez 6, R. Dacayana 5, S. Cal 4, J. Celestial 2.