Mga sugboanon misidlak sa Team Philippines

CEBU, Philippines — Dako og natampo ang mga Sugboanong atleta sa paglangkat sa Team Philippines sa kampiyonato sa bag-o lang natapos nga 30th Southeast Asian (SEA) Games.

Ang Pilipinas maoy  overall champion sa labing unang higayon sukad niadtong 2005 bitbit ang 149 ka gold, 117 ka silver ug 121 ka bronze medals.

Tipik sa naglagiting nga kalampusan sa nasud mao ang mga Sugboanon nga sa kinatibuk-an nakadonar og 61 ka medalya nga gibuak-buak ngadto sa 19 ka golds, 19 ka silver ug 24 ka bronze.

Ang dancesport champions nga sila si Wilbert Aunzo ug Pearl Marie Caneda, skateboarding sensation Margielyn Didal, record-breaking swimmer James Deiparine, billiards queen Rubilen Amit ug basketball stars June Mar Fajardo ug Greg Slaughter maoy nangu sa pagratsada sa mga Sugboanon sa maong torneyo nga mahitabo kausa lamang sud sa duha ka tuig.

Sila si Aunzo ug Caneda mibira og tagutlo ka bulawan sa samba, chacha ug rumba classes ubos sa Latin discipline sa dancesport competition, si Didal mipugnit og duha ka golds sa women's skate ug street competition sa skateboard event, samtang si Deiparine miputol sa 10 ka tuig nga huwaw og medalya sa nasud sa swimming human gibuak ang record sa men's 100-meter breaststroke. Sama ni Didal, si Amit nakatira sab og duha bulawan sa women's 9-ball singles ug doubles event, samtang sila si Fajardo ug Slaughter miaswat sa Philippine men's basketball team ngadto sa ika-13 niining sagunson nga titulo sa SEA Games.

Ang lain pang mga Sugboanong gold medallists sa duha ka semana nga aksiyon mao sila   si  Daniella  Reggie de la  Pisa  (gymnastics), Kiyomi  Watanabe  (judo), Dexter     Bolambao (arnis),   Metodio  Suico  Jr. ug  Jean  Marie  Sucalit (sepak takraw), Daniel Lederman (skateboarding), Louise Kaye Go (golf), James Erice Guerra ug Van Manalaysay (E-Sport) ug Mary Ann Antolihao (women's softball).

Nakatampo og silver mao sila si Andrew Kim Remolino (triathlon), Jude Oliver Marie Rodriguez (arnis), Niño Surban (cycling),  John Fabuar Ceniza ug Elreen Ann Ando (weightlifting), Jasmine Alkhaldi (swimming), Ditto Nestor Dinopol (shooting), Mary Joy Tabal (marathon), Sherwin Managil (obstacle racing course), Rinna Babanto ug Aidaine Laxa (taekwondo), Raphael Trinidad (wakeboarding), Aiumi Ono (rugby football) ug Jerome Bacarisas ug Jasper Cabrera (softball).

Samtang ang mga naka-bronze medal mao sila si Rhey Jhey Ortouste ug Jean Marie Sucalit (sepak takraw), Jonel Carcueva (cycling), Hannah Marie Fonacier (women's water polo), Jasmine Alkhaldi (swimming), Warren Kiamco (billiards), Larry Avila (shooting), Cherry Ann Rondina, Floremel Rodriguez, Edmar Bonono, ug James Buytrago (beach volleyball),  Alexis Sy (bowling), Sarah Pangilinan (karatedo), Nica Garces (taekwondo)  ug Richard Gonzales (table tennis).