Dedikasyon at determinasyon susi ng team philippine sa pagkopo ng 30th SEAG championship
MANILA, Philippines — Walang dapat bigyan ng kredito sa pagiging overall champion ng Pilipinas sa katatapos na 30th Southeast Asian Games kundi ang buong delegasyon.
Humakot ang Team Philippines ng kabuuang 149 gold, 117 silver at 121 bronze medals mula sa nilahukang 56 sports events.
Ito ang ikalawang overall crown ng bansa sa biennial event matapos noong 2005 kung saan nagtala ang mga Pinoy athletes ng 113 ginto, 84 pilak at 94 tansong medalya.
“We all worked hard for this,” sabi kahapon ni Philippine Sports Commission chairman at Chef De Mission William ‘Butch’ Ramirez.
“The Philippine Olympic Committee, national sports associations, the Philippine SEA Games Organizing Committee, the government, the private sector and the Filipino people all came together to show our team that they have the whole nation rooting for them. Salamat po sa lahat,” dagdag pa nito.
Noong 2017 SEA Games na idinaos sa Kuala Lumpur, Malaysia ay nag-uwi lamang ang Pilipinas ng 23-34-63 gold-silver-bronze medals.
Para makamit ang overall title sa ikaapat na pamamahala ng bansa sa SEA Games ay gumastos ang PSC ng P1.5 bilyon para sa international training at exposures ng mga national athletes.
Nakatuwang ng sports agency sa paglikom ng pondo ang Philippine Amusements and Gaming Corporation na nagpaayos sa mga sports facilities sa Rizal Memorial Sports Complex sa Manila at sa Philsports Complex sa Pasig City.
“Our athletes gave their all and they deserve all the respect and care that we can give them, as kababayans and as a nation. You all made us proud. Salamat sa inyong sakripisyo, tiyaga at pagpupursigi,” ani Ramirez, ang Chef De Mission noong 2005 Manila SEA Games.
Sumegunda sa Pilipinas ang Vietnam na mayroong 98 gold, 85 silver at 104 bronze medals kasunod ang Thailand (92-103-123), Indonesia (72-84-111), Malaysia (55-58-72) at Singapore (53-46-68).
“All your hard work and achievement produced more than just medals. It lifted the spirit of a nation hungry for inspiration and hope. It awakened the spirit of patriotism. Old Filipino values were in full show for the Filipino youth to see and emulate,” ani Ramirez.
“Pinaalala niyo sa amin na ang sarap maging Pilipino, lahi ng magigiting!!! For all these, maraming salamat!,” dagdag pa ng PSC head.
Sa ikalawang pagkakataon ay hahawakan ng Vietnam ang hosting ng SEA Games sa 2021.
Inangkin ng mga Vietnamese ang overall crown ng regional meet noong 2003 kung saan sila kumolekta ng 158 gold, 97 silver at 91 bronze medals habang tumapos ang mga Pinoy sa No. 4 mula sa nahakot na 48-54-75 medalya.
- Latest
