Pub Gee Resto Bar midaog na gyudsa FYA season 24

CEBU, Philippines — Nakatilaw na gyud og daog ang Pub Gee Resto Bar sa katapusan nilang duwa sa eliminasyon sa FYA Basketball League (Season 24) Soontit Construction Cup 2019-2020.

Ang Pub Gee Resto Bar mipilde sa Central Ice Cream/Nevaeh Sales Trading, 92-83 niadtong Martes diha sa Atillo gym sa Punta Princesa, Dakbayan sa Sugbo.

Midaog man tuod, apan iwit gihapon sila sa standing sa ilang 1-6 nga baraha ug sangkaon nila ang No. 1 nga Purefit Gym nga nakabaton og 'twice-to-beat' advantage sa quarterfinals.

Responsabli sa maong kadaogan mao si Jaybee Silvano nga mibagnos og 24 puntos uban ang siyam ka rebounds, upat ka assists ug duha ka steals nga igo na kaayo alang kaniya aron ilho nga best player of the game.

Nakatampo sab og dako si Mervin Manila nga miantog og 18 puntos sa Pub Gee Resto Bar nga wala na molingi pa human maangkon ang 73-65 nga labaw sa third quarter.

Sila si Juvinelle Enriquez ug Dave Caballes mitampo'g 15 puntos matag usa sa kadaogan, samtang si Jessie Boy Condrillon miambit og 14 puntos sa Pub Gee Resto Bar ni Boyet Duran.

Nangu sa Central Ice Cream/Nevaeh Sales Trading mao si Kier dela Peña nga mikandos og 17 puntos, gisundan ni Emman Reubal nga adunay 15 puntos ug Noel Medalle sa iyang 12 puntos.

Ang Central Ice Cream/Nevaeh Sales Trading nilang co-managers Jofel Tejada ug Noel Medalle mitapos sa elimination round bitbit ang 2-5 nga baraha.

Sa laing duwa, ang Masterline mikulit sa ilang ikaduhang sunod-sunod nga daog pinaagi sa paglubong sa Yoyi's Pastries & Desserts, 84-70.

Ang maong kadaogan nagtukmod kanila ngadto sa ikaduhang dapit sa standing bitbit ang 4-3 win-loss record.

Gipangulohan na sab ni Socrates Aglipa ang Masterline nga mitabas og 26 puntos. Mihimo sab siya og unom ka rebounds, lima ka assists ug duha ka steals nga nakapahimo kaniya isip best player of the game.

Si Francis Paracuelles miposa og 25 puntos, samtang si Jamel Eriso miabuno'g 15 puntos sa Masterline ni Noel Medalle.

Ang Yoyi's Pastries & Desserts nga nalabay sa ikatulong dapit, gipangulohan mismo sa ilang team manager Ahlmark Albarracin nga miduslit og 23 puntos, samtang si Jao Rabadon midagkot og 18 puntos sa napildeng koponan.